Засгийн газрын ээлжит хуралдаан боллоо. Хуралдаанаар хэлэлцсэн асуудлын талаар Шадар сайд Ө.Энхтүвшин мэдээлэл хийлээ.

Тэрбээр:

-Цагаан сарыг тэмдэглэхгүй байх Ерөнхийлөгчийн зарлиг гарчээ. Ерөнхийлөгчийн зарлигт "Дэлхийн олон улс болон манай хөрш БНХАУ-д шинэ коронавирусийн тархалт эрс нэмэгдэж байгаатай холбогдуулан 17 дугаар жарны Хотол төгс хэмээх төмөр хулгана цагаан сарын баярыг тэмдэглэхгүй байж, болзошгүй аюулаас урьдчилан сэргийлэх зорилгоор дараах арга хэмжээ авахыг Засгийн газарт чиглэл болгосон" байгаа. Мөн олон улсын хол хориот болон халдварт бусад өвчнөөс урьдчилан сэргийлэх, өвчин гарсан үед тархахгүй байх, таслан зогсоох зорилгоор хөл хорио, хорио цээрийн дэглэм тогтоох асуудлыг Засгийн газрын хуралдаанаар яаралтай журамлан, мөрдүүлэхийг тусгасан байна. 

Цагаан сарын баярт зориулсан олон нийтийг хамруулсан үзэсгэлэн худалдаа, захыг хааж, телевиз, радиогоор нэвтрүүлэх реклам сурталчилгааг даруй зогсоох, хэвлэл, мэдээллийн хэрэгслээр шинэ коронавирусийн халдвараас урьдчилан сэргийлэх иргэдийн үүрэг, хариуцлага, уг халдварын хор хөнөөлийг ухуулан ойлгуулах, соён гэгээрүүлэх ажлыг хэвлэл, мэдээллийн байгууллагуудтай хамтран зохион байгуулахыг чиглэл болгосон байна. Түүнчлэн элхий дахинд хүнээс хүнд, мал, амьтнаас хүнд халдварлах халдварт өвчин ихээр тархах болсонтой холбогдуулан Гамшгаас хамгаалах тухай, эрүүл мэндийн тухай болон бусад хууль тогтоомжийн төслийг боловсруулж, Улсын Их Хурлын хаврын чуулган, шаардлагатай бол ээлжит бус чуулганаар яаралтай горимоор хэлэлцүүлэх чиглэлийг өгчээ. 

Засгийн газрын хуралдаанаар энэ асуудлыг хэлэлцэж, засаг захиргаа, нутаг дэвсгэрийн нэгж, хуулийн байгууллагуудыг гамшгаас хамгаалах өндөржүүлсэн бэлэн байдлын зэрэгт шилжүүлэх тогтоол гаргалаа. Үүнтэй холбоотой Цагаан сарын баярыг нийтээр тэмдэглэхгүй байх нь зүйтэй гэсэн тогтоол гаргалаа хэмээн мэдээлэв. Шадар сайд Ө.Энхтүвшин мэдээлэл хийснийхээ дараа сэтгүүлчдийн асуултад хариулав. 

-Өндөржүүлсэн бэлэн байдлыг хангах ямар бэлтгэл хийх вэ?

-Гамшгаас хамгаалах мэдээллийг хүн амд хүргэх талаар байгаа. Засаг захиргаа, нутаг дэвсгэрийн байгууллагад өндөржүүлсэн бэлэн байдлын зэрэгтэй ажиллана. Гамшгийн зарлан мэдээллийг хүн амд шуурхай хүртээмжтэй хүргэнэ. Хорио цээрийн дэглэмийг одоохондоо тогтоогоогүй байгаа. Гамшгийн нөөцийг улсын хэмжээнд Засгийн газрын шийдвэрээр, орон нутагт тухайн шатны Засаг даргын захирамжаар бүрдүүлнэ. 

-Цагаан сарыг тэмдэглэхгүй гэхээр ямар хорио тогтоох вэ?

-Цагаан сарыг тэмдэглэхгүй байх нь зүйтэй гэж үзсэн. Ингэхдээ гэр бүлдээ мөрөө гаргах, ёсоо үйлдэж болно. Харин хөдөлгөөнийг л хориглож байгаа юм. 

Н.Энх