Шинэ төрлийн титэм вирустэй тэмцэхэд Италид тусламж үзүүлэх Оросын цэргийн мэргэжилтнүүдийг тээвэрлэсэн цэрэг тээврийн Ил-76 онгоцууд Италийн Ром хотын ойролцоох нисэх буудалд газардсан талаар ОХУ-ын Батлан хамгаалах яам мэдээллээ. 

Оросын цэргийн вирус судлаачид, тусламжийн бүтээгдэхүүн хүргэх долоон онгоц ням гаригт хөөрчээ. 

"Оношилгооны төхөөрөмж, ариутгалын тоног төхөөрөмж болон Оросын цэргийн мэргэжилтнүүдийг тээвэрлэсэн Оросын Агаар сансрын хүчний цэрэг тээврийн нисэхийн Ил-76 долоо дахь онгоц Италийн Агаарын цэргийн хүчний "Пратика-ди-Маре" баазад газардлаа" хэмээн Оросын БХЯ мэдэгджээ.

 

Тусламжаар очсон эхний онгоцыг Италийн Гадаад хэргийн сайд Луижи Ди Майо угтан авсан байна. Онгоцнууд, тоног төхөөрөмж болон техникүүд дээр "Оросоос хайр түгээв" гэсэн англи болон итали хэл дээрх бичигтэй зүрхэн хэлбэртэй наалт наажээ. 

Оросоос нийтдээ есөн Ил-76 нисэхээр төлөвлөгдсөнөөс долоо дахь нь ийнхүү өнөөдөр Италид газардсан байна. Эдгээр онгоцууд 100 орчим цэргийн вирус судлаачид болон тахал судлалын мэргэжилтэн, эмч, сувилагчдын найман багийг Италид хүргэх аж.

Г.Бямбасүрэн