Д.Сарангэрэл: Олон түмнийхээ итгэлийг хөсөрдүүлсэн зүйл хийгээгүй, хийх ч үгүй
Коронавирусийн халдвар олон улсад тархаж зарласан энэ цаг үед манай улсын ЭМЯ онцгой байдлын дэгд шилжин ажиллаж байгаа. Өнөөдрийн байдлаар гаднаас коронавирусийн халдвартай иргэд бүртгэгдэн, эмчлэгдэж, зарим нь эдгэрч, эмнэлгээс гарсан билээ. Тэр дундаа анх халдвар тээж ирсэн францын иргэнийг манай эмч нар бүрэн эмчилж эдгэрүүлэн, өнөөдөр сувилалд шилжүүлээд байна. Тиймээс ч У.Хүрэлсүхийн Засгийн газрын гишүүдээс ЭМ-ийн сайд Д.Сарангэрэлд олон нийт маш сайн ажиллаж байгаа гэсэн дүн тавьж, сайшаалтай хандаж байгаа. Харин ЭМ-ийн сайд Д.Сарангэрэлийг сүрдүүлж, олон сая төгрөг нэхсэн үйлдэл гарчээ. Тэрбээр энэ талаар өөрийн цахим хаягтаа байр сууриа илэрхийлсэн байна. ЭМ-ийн сайд Д.Сарангэрэл:
-Өнөөдөр уг нь "сөрөг" мэдээлэлтэй сайхан өдөр байлаа. Гэвч та бүхэндээ хэлэх зүйл хувь хүний хувьд байна. Өмнөх парламентад 11 эмэгтэй сонгогдож бид нам харгалзахгүй хамтран ажилласан билээ. 4 жил нэг "ангид" байсан болохоор хүний хувьд тэдэнтэйгээ гэмгүй байдаг. Одоо ч хэн нэгэнд маань зовлон жаргал учирвал хуваалцаад л явдаг. Харамсалтай Л.Эрдэнэчимэг гишүүн бид 2-ын хэнийх нь ФБ мессенжерийг хакердсаныг мэдэхгүй байна. Түүнтэй харилцаж байсан мессежийг гартаа оруулж олон нийтэд түгээнэ гэж сүрдүүлэн олон сая төгрөг надаас нэхлээ. Би татгалзсан. Цагдаагийн байгууллагад энэ асуудлыг өгч шалгуулж байгаа болно. Өмнө нь ч, одоо ч хэн нэгэнтэй, тэр дундаа Л.Эрдэнэчимэгтэй ямар нэгэн хууль зөрчсөн, хамтарсан үйлдэл нэгээхэн ч хийгээгүй учраас надад санаа зовох зүйл алга. Гагцхүү энэ хүнд хариуцлагатай үед гол үйл явдлаас хөндийрүүлэх, олон нийтийн анхаарлыг сулруулах, өөр асуудалд хандуулах ад муу санаархал явж байж мэднэ гэж болгоомжилж буй учраас төрийн хариуцлагатай албыг онцгой үед хашиж байгаа хүний хувьд та бүхэндээ мэдэгдэх нь зүйтэй гэж үзлээ. Миний хувьд улс орон, ард түмнийхээ эрүүл мэнд, аюулгүй байдлын төлөө бүхнийг умартан зүтгэж байгаа олон хүний л нэг. Өөрийн болон гэр бүл, хамтран зүтгэгчид, найз нөхөд, олон түмнийхээ нүүрийг улайлгаж, итгэлийг хөсөрдүүлсэн зүйл хийгээгүй, хийх ч үгүй гэдгээ илэрхийлье хэмээжээ.
Н.Нягт
СЭТГЭГДЭЛ БИЧИХ