Нийслэлийн Засаг даргын орлогч Д.Мөнхжаргал Гандангийн айл өрхүүдийн зуух, яндангийн бүрэн бүтэн байдалтай танилцаж, заавар зөвлөмж өглөө. Тэрбээр:

-Гандантэгчинлэн хийд орчим нь Монголын шашин, Аялал жуулчлалын төв болно гэсэн төлөвлөгөөтэй. Энэ цэгт агаарын, хөрсний бохирдол ноцтой хэмжээнд байдаг. Улаанбаатар хотын үүсэл 200 жилийн өмнө Гандангийн хэсэгт хүмүүс суурьшиж байсан учраас хөрсний бохирдол ихтэй. Улсын төсвөөр гурван тэрбум орчим төгрөгөөр дулаан дамжуулах төв, зарим гудамжны дэд бүтцүүд төсөвлөгдөн.

Нийслэлийн Засаг даргын захирамжийн хүрээнд нэгдүгээр хэсгийг төвлөрсөн дулаан хангамж төвийн цэвэр, бохирт холбох дэд бүтцийн ажлыг хийж байгаа. Улаанбаатар хотын төвд орон сууц дунд байдаг энэ хэсэг нь агаарын чанарыг сайжруулах гуравдугаар бүсэд дангаараа хамрагддаг. Энэ жилийн хувьд БОАЖ-ын сайд, Нийслэлийн засаг дарга бөгөөд Улаанбаатар хотын захирагчийн хамтарсан тушаалаар агаарын чанарыг сайжруулах бүсэд орж үе шаттайгаар яндан, нүхэн жорлонгүй бүс болно гэж батлагдсан. Хөрсний бохирдлын шинжилгээгээр дээжүүдийг авч үзвэл 88 хувийн нянгийн бохирдолтой гэж гарсан.

Гандан орчмын өрхүүдийн нүхэн жорлонгийн судалгааг хийж дууслаа. Нийт 781 жорлон байгаагаас 13 нь стандартын жорлон байсан. Нэг айлын хашаа буюу 0,5 га дотор доод тал нь тав болон түүнээс илүү жорлонгоор дүүрч эрүүл хөрсгүй, дахин нойл ухах ямар ч боломжгүй байдалд хүрсэн.

 Эрүүл мэндийн салбарын судлаачдын хэлж байгаагаар гандан орчимд ажиллаж амьдарч байгаа хүмүүс хөрс, нянгийн бохирдлоос болж олон төрлийн өвчлөл авч болохоор байна гэдэг. Гандангийн тэнд 1300 орчим айл байна гэж байгаа ч нэг жижигхэн хашаанд тав, зургаан монгол гэртэй айлууд байдаг.

Энэ газрыг өндөр барилга барина гэж төсөөлөөд компаниудтай тохирчихсон. Орон сууцын дахин төлөвлөлтийн ажил хийе гээд иргэдээс санал авахаар 250 мянган төгрөгөөс дээш үнэлгээ хэлдэг. Гэтэл энэ хэсэг газрын гүн рүүгээ 2,8 м хүртэл гүний бохирдолтой. Энэ удаагийн Агаарын чанарыг сайжруулах бүсээр л боломж гэж харан иргэд ухамсарлах хэрэгтэй. Энэ газарт 9 метрээс дээш барилга барих боломжгүй гэж дүгнэгдсэн. Нийслэлийн төсвийн хөрөнгө оруулалтаар иргэддээ тусалж байгаа юм. Яндан, нүхэн жорлонгоо буулга гээгүй төвлөрсөн дулаан хангамж гээд бүх дэд бүтцийн шугамуудыг нь татаж өгч байна. Одоо иргэд маань ухамсартайгаар хөрөнгө оруулалтаа оруулж, өөрсдийн тав тухыг хангахуйц орчин үеийн орон сууцаа барих  хэрэгтэй байна. Дээрээс нь аялал жуулчлалын бүс болж буй учраас энэ боломжийг ашиглан орлого ашгаа нэмэгдүүлэх ч боломжтой юм гэлээ.

Э.Үүрийнцолмон