УОК-оос цаг үеийн асуудлаар мэдээлэл хийлээ.

 Шадар сайд Я.Содбаатар:

-Коронавирус цар тахлын улмаас дэлхийн 66 улс дотоодын хөдөлгөөндөө  хязгаарлалт тогтоогоод байгаа бол  106 улс олон нийтийн цуглаан, боловсролын байгууллагынхаа үйл ажиллагааг хязгаарлаж байна. 115 улс хилээ хэсэгчилэн болон бүрэн хааж, хөл хорио тогтоож байгаа. 

Тиймээс УОК-оос  гамшгаас хамгаалах өндөржүүлсэн бэлэн байдлын хугацааг арванхоёрдугаар  сарын 31 хүртэл сунгахаар шийдвэрлэлээ. Энэ шийдвэр Засгийн газрын хуралдаанаар  батлагдана.

Хоёрдугаарт, улс хоорондын буюу дамжин өнгөрөх ачаа тээврийн зохицуулалтын талаар хэлэлцлээ. Учир нь сүүлийн өдрүүдэд Алтанбулаг боомтоор орж ирж байгаа иргэдээс түүн дотор улс хоорондын болон дамжин өнгөрөх ачаа тээвэрлэж байгаа жолооч нараас коронавирусийн халдвар илэрч байна. Өнөөдрийн байдлаар 28 жолоочоос коронавирусийн халдвар бүртгэгдсэн. Тиймээс хамгийн эрсдэлтэй цэг гэж үзэн тодорхой арга хэмжээ авахаар боллоо. Коронавирусийн халдварын эрсдэлийг нутгийн гүнд зөөвөрлөхгүй байх зорилгоор Алтанбулагийн боомтоор жолооч нарыг нэвтрүүлэхгүй байх зохицуулалтын арга хэмжээг авч хэрэгжүүлнэ.

Улс хоорондын болон дамжин өнгөрөх  ачаа тээврийн зохицуулалтын арга хэмжээг арванхоёрдугаар сарын 01 гэхэд шийдвэрлэнэ. 

ГХЯ-ны Консулын газрын захирал Л.Мөнхтүшиг:

-Өнөөдрийн байдлаар тусгай үүргийн 98 удаагийн нислэг үйлдэж 19519 иргэнийг эх оронд нь авч ирээд байна. Өнгөрсөн хугацаанд автозамаар болон агаарын замаар нийтдээ 26100 иргэнийг татан авчээ.  Арваннэгдүгээр сард нийт 10 удаагийн нислэг үйлдэнэ. Үүнээс 6 удаагийн нислэгийг БНСУ-руу, Франкфурт руу нэг удаагийн нислэг, Япон улсад оршин суух виз нь гарсан иргэдийг хүргэж өгөх зорилгоор Токио хот руу хоёр удаагийн нислэг үйлдэнэ. Мөн Казахстан улс руу нэг удаагийн нислэг үйлдэнэ гэж мэдээлээд сэтгүүлчдийн асуултад хариуллаа. 

 Шадар сайд Я.Содбаатар:

Алтанбулагийн боомтоор жолоочид нэвтрэхгүй гэсэн үг үү? 

-Алтанбулаг боомтоор жолоочид нэвтэрнэ. Гэхдээ ачаагаа татах дээр хязгаарлалт хийж байгаа. 

-Олон нийтийн арга хэмжээ зохион байгуулахгүй гэсэн үг үү? Жишээ нь шинэ жилийн баяр?

-Эдийн засгийг идэвхжүүлэх үүднээс наймдугаар сарын 01-нээс  бүх олон нийтийн арга хэмжээг шат дараатай нээсэн. Шинэ жилийн арга хэмжээг хориглох эсэх талаар УОК-оос шийдвэр гараагүй. Судалж байгаа. Мэргэжлийн хүмүүс эрсдэл өндөр байна гэсэн асуудлыг хэлж байгаа. 

Г.Мичидмаа