Сэлэнгэ аймгийн Зүүнхараа сумаас "тархины цусан харвалт" оноштойгоор Улаанбаатар хотод ЭХЭМҮТ-д хүргэгдсэн арван настай охин амиа алдсан харамсалтай явдал гараад байна.

Талийгаач охины ээж "Арваннэгдүгээр сарын 18-ны өглөө охин маань гэнэтхэн "Ээж ээ толгой өвдөөд байна" гээд уйлаад босоод ирсэн. Тэгээд толгойгоо бариад бөөлжөөд эхэлсэн. Сумынхаа түргэн рүү яриад үзүүлтэл хоолны хордлого байна" гээд өвчин намдаах эм бичиж өгөөд явсан ч бөөлжсөөр байсан учраас дахиад түргэн дуудаад Зүүнхараа руу хувийн унаагаараа явсан. Тэнд нугасны ус аваад цустай гарч байна, харвалт юм шиг байна гэж оношилсон. Тэр эмнэлэгт нэг хоноод охин маань үүрээр таталт өгсөн. 

Ингээд хүүхдээ аваад Улаанбаатар хот руу явсан. Эмээлт, 22-ын товчоон дээр 3 өнгөрч байхад очсон. Тэнд ажиллаж байсан хүмүүс коронатай газраас ирсэн гээд оруулахгүй байсан. Түргэний эмч маань Гуравдугаар эмнэлэг рүү ярьсан корона гарсан бүс нутгаас ирсэн гээд аваагүй. ЭХЭМҮТ-рүү ярьсан, бас авахгүй гэсэн. 

Товчоон дээр ажиллаж байгаа хүмүүс эмнэлэг хүлээж авбал танай хүүхдийг оруулна гэдэг шаардлага тавьж байсан. Яах ч аргагүй болоод, хүчилтөрөгч нь дуусах гээд байсан тул жолооч эмч хоёр маань 61-ын гарам хүртэл явсан чинь "Зүүнхараагийн эмнэлгээс яриад яаж ийж байгаад ор" гэж зөвлөсөн тул буцж очоод УОК-оос эхлээд олон газар руу ярьсан. Тэгтэл ашгүй "Эх нялхсын дарга нь ярьж байна. Хүүхдийг чинь хүлээж авъя" гэсэн. Эцэг, эх нь харин тусгаарлагд гэсэн. Улсын том эмнэлэг л бараадчихвал хүүхэд маань аврагдана гэж бодсон тул тусгаарлагдахаар болсон. 

Ингээд арваннэгдүгээр сарын 20-ны 10.00 цагийн үед ЭХЭМҮТ хүүхдийг минь хүлээж авсан. Түргэний эмч охиныг маань тэврээд орсон. Нөхөр бид хоёрыг тусгаарлагд гэсэн тул бид өөрсдөө тусгаарлах байр хайгаад арай гэж нэг газар олтол "Энд БНХАУ-ын гурван иргэн байгаа" гээд ойртуулаагүй. Тэгээд бид хоёр хадам эгчийнд очиж хоносон. ЭХЭМҮТ-өөс хүүхдийнхээ биеийг асуухад "Танай хүүхэд сэхээнд орохооргүй хүүхэд байна" гэсэн.

Түргэвчилсэн оношлуураар коронагийн шинжилгээний хариу сөрөг гарсан. Сүүлийн шинжилгээний хариу гарах хүртэл хоёр хоног би охинтойгоо уулзаагүй. Ингээд гуравдахь өдөр нь аравхан минут уулзуулсан. Тэгэхэд охиныг минь "Өөрийн ухаангүй болсон. Тархи нь ажиллагаагүй болж эхэлж байна. Хөдөлгөөн хийхээр энэ бол ухамсарт хөдөлгөөн биш гэж эмч тайлбарласан.

Маргааш нь уулзах гээд PCR шинжилгээний хариугаа хүлээгээд л байсан. 119 дугаар руу, УОК руу ярихаар НОК руу ярьсан тусыг олоогүй. ЭХЭМҮТ-өөс шинжилгээний хариу чинь гарсан уу л гээд байсан. 

Харамсалтай нь охин маань арваннэгдүгээр сарын 25-ны өдөр нас барсан" гэж ярилаа. 

Харин ЭХЭМҮТ-ийн дарга Ш.Энхтөр "Хүүхэд тархины харвалт гэсэн оноштой Сэлэнгийн Зүүнхараагаас Улаанбаатар хотод тээвэрлэгдэж ирсэн. Дарханы голомттой бүс нутгийг дайраад ирсэн болохоор манай эмнэлэг тусгай өрөө гаргаж тусгай эмч сувилагч хүлээн авч бүхий л эмчилгээг цаг алдахгүй хийсэн. Короннавирусийн шинжилгээний хариу сөрөг гарсан тул Сэхээн амьдруулах тасагт хэвтүүлж шаардлагатай эмчилгээг хийсэн ч амьдарч чадаагүй.

Манайх болон Гуравдугаар эмнэлгийн мэс заслын тусгай баг гарч энэ охинд эмчилгээ хийсэн ч биеийн байдал нь хүнд байсан учир яаж ч чадаагүй юм" гэх тайлбарыг өгсөн байна.

Эндээс хэд хэдэн асуудал гарч ирж байна. 

1. Коронавирус гарсан голомтод бүс нутаг буюу Сэлэнгэ аймгаас ирсэн тул өвчтэй охиноо эмнэлэгт даатгаж орхиод ээж нь өөрөө тусгаарлагдах байр хайж явжээ. Олдохгүй байсан тул арга мухардаж хадам эгчийндээ очиж хоносон. Эндээс харахад голомтод бүс нутгаас ирсэн иргэнийг хэн хүлээн авч хаана тусгаарлах нь тодорхойгүй аж. 

2.Түргэвчилсэн оношлуураар хариу сөрөг гарсан ч PCR хариугаа хүлээсээр хоёр хоножээ. Мөн л хаанаас хэн энэ хариуг өгөх нь тодорхойгүй хүлээсээр охинтойгоо уулзаж чадалгүй охин хорвоог орхижээ.

Тэгвэл арван настай охин амиа алдсан явдалд эмчилгээ хийсэн ч аварч чадаагүй эмч, эмнэлгийн буруу юу? Шинжилгээний хариу шаардаж товчоон дээр удааж хугацаа алдуулсан УОК буруутай юу?

Б.Итгэл