Улаанбаатарт 3600 гаруй үсчин, гоо засалч үйл ажиллагаа эрхэлдэг байна. Эдгээр хувиараа хөдөлмөр эрхлэгчид коронавирусийн нөхцөл байдлын улмаас тогтоосон хязгаарлалтын улмаас орлогогүйдэж, үйл ажиллагааг нь нээх хүсэлтийг Нийслэлийн захирагчийн ажлын албанд удаа дараа тавьсаар байгаа аж. 

Үсчин, гоо сайхны газруудыг нээх боломжгүй шалтгааныг Захирагчийн ажлын албанаас ингэж тайлбарлалаа. 

"Үсчин, гоо засал нь дундаас дээш эрсдэлтэй гэдэг ангилалд ордог. Үсчин, гоо сайхныг нээхэд ДЭМБ-аас тавьж байгаа 15 минутын хязгаартын хугацааны асуудал байна. Өөрөөр хэлбэл үсчинг нээхэд ойрын хавьтал гэдэг нэршил дээр тавигдаж байгаа хугацааны асуудал тулгараад байгаа юм. 

Захирагчийн ажлын алба, Нийслэлийн Онцгой комиссоос цар тахлын улмаас хөл хорио тавигдсан үеэс эхлэн салбаруудын эрсдэлд хэд хэдэн хүчин зүйлийг онцлон эрэмбэ тогтоосон. Тухайлбал эдийн засгийн статистик тооцдог 90 гаруй ангилал байна. 

Үйл ажиллагааг нь хязгаарлаад байгаа салбарууд хүний бөөгнөрөл үүсгэх нөхцөл байдалтай, анхдагч хэрэгцээ биш. Мөн цаашлаад хяналт тавих боломжийг харж үзэж байгаа. Улаанбаатар хот халдварын голомт хэвээр байгаа энэ үед хүнсийг бараатай харьцуулах байдлаар хандахгүйгээр эрсдэлийн үнэлгээг гаргаж эрэмбэлж байгаа гэдгийг ойлгохыг хүсч байна" гэлээ.