Коронавирусийн халдвартай дөнгөж амаржсан эмэгтэйг зүй бусаар эмнэлэг хооронд тээвэрлэсэнтэй холбогдуулан иргэд, олон нийт Улсын Онцгой комиссын гишүүдийг огцрохыг шаардаж Сүхбаатарын талбайд жагсаал зохион байгуулж байна. 

Шадар сайд, Улсын Онцгой комиссын дарга Я.Содбаатар, Эрүүл мэндийн сайд Т.Мөнхсайхан нар ажлаа хүлээлгэн өгөх өргөдлөө Монгол Улсын Ерөнхий сайд У.Хүрэлсүхэд хүлээлгэн өгч буйгаа мэдэгдлээ. 

Шадар сайд Я.Содбаатар "Бид коронавирустэй тэмцэх тэмцэлд очих цэгээ харж байсан юм. Энэ хүнд цаг үед галын фронтод ажилласан эмч ажилтнууд, мэргэжлийн хяналт, онцгой, цагдаагийн нийт бие бүрэлдэхүүнд Засгийн газар, УИХ-д хамтран ажилласан явдал талархлаа илэрхийлж байна. Ингээд Улсын Онцгой комиссын даргын хувьд Монгол Улсын Шадар сайдын албанаасаа огцорч байгаа өргөдлөө хуулийн дагуу Ерөнхий сайдад хүргүүүлж байна. Дахин хэлэхэд нийт ард иргэдээсээ уучлал хүсч байна" гэв.

Эрүүл мэндийн сайд Т.Мөнхсайхан "Ард иргэдээ дэлхий нийтийг хамарсан цар тахлаас сэргийлэхийн тулд бүхий л хүчээ дайчлан ажиллаа. Үүний үр дүнд өнгөрсөн хугацаанд бид халдварын дэгдэлтийг хохирол багатайгаар даван тууллаа. Эрүүл мэндийн салбарт олон жилийн турш бугшсан буруу тогтолцоог өөрчлөхийн тул бүхий л хүчээ дайчлан ажилласан. Үүний үр дүнд тодорхой хэмжээний өөрчлөлтүүд гарсан.

Эрүүл мэндийн салбарын 57 мянган ажилчин бий. Хариуцлагагүй цөөн хүний үйлдлээс болж нойр, хоолгүй зүтгэж байгаа эрүүл мэндийн салбарынхныг үгүйсгэж болохгүй шүү гэдгийг та бүхнээс хүсч байна. Ингээд Эрүүл мэндийн сайдын албан үүргээсээ чөлөөлөгдөх хүсэлтээ Ерөнхий сайдад уламжлах болно" гэж мэдэгдлээ. 

Сүхбаатарын талбайд цугласан иргэд, олон нийтийн жагсаал үргэлжилсээр байна. 

Г.Сүрэн