Боливийн Ерөнхийлөгч асан, тус улсын социалист хөдөлгөөний тэргүүн Эво Моралес коронавирусийн халдвараа эмчлүүлэн, эмнэлгээс гарсан талаараа Твиттер хуудсандаа мэдээлжээ. 

Моралес Лос-Оливос эмнэлгийн эмч, мэргэжилтнүүдэд өөрийг нь эдгээсэнд талархаж байгаагаа илэрхийлсэн байна. "Тэдний гаргасан хичээл зүтгэлийг ихэд хүндэтгэн, биширч байгаагаа илэрхийлье" хэмээн тэрбээр бичжээ. 

Моралес коронавирусийн халдвар авсан талаарх мэдээлэл нэгдүгээр сарын 13-ны өдөр хэвлэлүүдээр гарч байлаа. Үүний дара тэрбээр Твиттер хуудсандаа "биеийн байдал сайн байгаа, санаа зовниж буй хүмүүст талархаж байна" хэмээн бичиж байв.

Эргэн сануулахад, 2019 оны 10 дугаар сард Боливт Ерөнхийлөгчийн сонгууль болж, Эво Моралес 47.07 хувийн санал авсан бол түүний өрсөлдөгч Карлос Меса 36.51 хувийн санал авсан юм. Гэсэн ч Меса өрсөлдөгчийнхөө ялалтыг хүлээн зөвшөөрөлгүй, түүний дэмжигчид эсэргүүцлийн жагсаал зохион байгуулж улмаар эмх замбараагүй байдал дэгдсэн. Үймээний улмаас Эво Моралес албан тушаалаасаа огцорч, Мексик рүү явахаас аргагүй болж байв. Ерөнхийлөгчийн үүргийг сенатын дэд дарга, сөрөг хүчний улс төрч Жанин Аньес гүйцэтгэж байсан бол 2020 оны 10 дугаар сарын 18-ны өдөр болсон Ерөнхийлөгчийн сонгуулиар Моралесын хамтран зүтгэгч Луис Арсе ялалт байгуулжээ. Хэдийгээр Эво Моралес Боливийн Ерөнхийлөгч биш хэдий ч тус улсын хамгийн нөлөө бүхий улс төрчдийн нэгд тооцогддог юм.

Г.Бямбасүрэн