Европын эм бэлдмэлийн агентлаг АНУ-ын "Жонсон энд Жонсон" компанийн вакциныг арилжааны журмаар ашиглах зөвшөөрөл өгөхийг зөвлөжээ. 

"Нарийвчилсан үнэлгээ хийсний дараа вакцины талаарх мэдээлэл нь найдвартай, үр дүн, аюулгүй байдал, чанарын шалгууруудад нийцэж байна гэсэн дүгнэлтийг Европын эм бэлдмэлийн агентлаг гаргасан" хэмээн агентлаг мэдэгджээ. 

Агентлагийн мэдэгдэлд коронавирусээс сэргийлэх Janssen вакцин нь Европын холбоонд зөвлөсөн дөрөв дэх вакцин гэдгийг онцолсон байна. Түүнчлэн ганцхан тунгаар хийж болох анхны вакцин нь Janssen  гэж Европын эм бэлдмэлийн агентлагийн гүйцэтгэх захирал Эмер Кук мэдэгджээ. 

АНУ, Өмнөд Африк, Латин Америкийн орнуудад хийсэн эмнэлзүйн туршилтын  дүнгээр Janssen вакцин нь 18-аас дээш насныханд үр дүнтэй гэж гарсан байна. Судалгаанд 44 мянга гаруй хүн оролцож, вакцины үр дүн 67 хувь гэж үнэлэгджээ.

Судалгааны явцад энэ вакцинаас үүдэлтэй гаж нөлөөнүүд нь хөнгөн болон дунд зэрэг байсны дээр тариулснаас хэд хоногийн дараа гаж нөлөөнүүд арилж байсныг Европын эм бэлдмэлийн агентлаг онцолсон байна. Гаж нөлөөнүүд дундаас хамгийн олон тохиолдож байгаа нь тарилга хийсэн хэсэгт өвдөх, толгой өвдөх, ядарч сульдах, булин өвдөх, дотор муухайрах гэсэн шинж тэмдгүүд байгаа гэнэ.

Г.Бямбасүрэн