Болгарын прокурорын газар 2011-2020 оны хооронд тус улсын цэргийн үйлдвэрүүд дээр гарсан дэлбэрэлтүүдэд Оросын зургаан иргэнийг холбогдуулан шалгаж байгаа талаар Коммерсант мэдээлжээ. Болгарын Прокурорын газрын төлөөлөгчийн мэдээлснээр, дээрх хугацаанд болсон дөрвөн дэлбэрэлт хоорондоо ижил төстэй шинж тэмдэг агуулсан байх бөгөөд дэлбэрэлт гарах бүрд Гүрж болон Украин руу тээвэрлэгдэх ёстой байсан бүтээгдэхүүнүүд устгагдсан байна.

"Оросын зургаан иргэн дэлбэрэлт болсон огноонуудтай ойролцоо өдрүүдэд Болгарын нутаг дэвсгэр дээр байсан нь тогтоогдсон. Оросын иргэд хүнд гэмт хэрэг үйлдсэнийг батлах нотлох баримт цуглуулж байна. Дөрвөн дэлбэрэлтийн үеэр Гүрж болон Украин руу тээвэрлэгдэх байсан бүтээгдэхүүн устсан. Эндээс харахад Болгар дахь дэлбэрэлт, Болгарын гурван иргэнийг хордуулах гэсэн оролдлого болон бусад орнуудад гарсан дэлбэрэлтүүд харилцан хамааралтай гэж үзэх үндэслэл бий" хэмээн Болгарын Прокурорын газрын төлөөлөгч мэдэгджээ.

Болгар дахь Оросын Элчин сайдын яаманд ОХУ-ын иргэд сэжиглэгдэж буй дэлбэрэлтийг мөрдөж байгаа талаар мэдээлэл өгөөгүй гэж Оросын дипломат төлөөлөгчийн газар мэдэгдсэн байна. 

Энд дуулгахад, гуравдугаар сарын 22-ны өдөр Болгарын Гадаад хэргийн яам Софи дахь Оросын ЭСЯ-ны хоёр ажилтныг "тагнуулын" дууилиантай холбоотойгоор "персона нон грата" хэмээн зарласан юм. Дипломатууд "НАТО-нууц" гэсэн дардастай баримт бичгүүдийг Оросын талд  тагнуул хийсэн хүмүүсээс дипломатууд  хүлээн авсан гэж Болгарын хэвлэлүүд бичиж байв.

Үүний дараа, дөрөвдүгээр сард Орос, Чехийн дипломат харилцаа хурцадсан. Дөрөвдүгээр сарын 17-ны өдөр Прагаас Оросын 18 дипломатыг хөөн гаргахаар болсон бөгөөд энэ нь 2014 онд Врбетице дэх зэвсгийн агуулахад гарсан дэлбэрэлтэд Оросын тусгай албаныхан буруутай гэж үзсэнтэй холбоотой юм. Үүний хариуд Орос улс Чехийн 20 дипломатыг хөөсөн. Үүний дараа Чехтэй нэгдмэл байгаагаа илэрхийлэн Словак, Латви, Литва, Эстони гэсэн орнууд дипломатуудыг нь хөөснөөр ОХУ ижил хариу арга хэмжээ авсан юм.

Москва, Прагын хооронд 1968 он эргэн ирэв

Г.Бямбасүрэн