Засгийн газрын өнөөдрийн хуралдаанаар Гашуунсухайт боомтын нүүрс тээвэрт үүсээд буй асуудлыг хэлэлцэж байна. Энэ асуудалтай холбогдуулан ЗГХЭГ-ын дарга Ц.Нямдорж чуулганы хуралдаанд оролцож, зарим тайлбарыг хийлээ.

Тэрбээр “Одооноос энэ асуудлаар хаана хаанаа нэгдсэн ойлголттойгоор цаашаа явахгүй бол болохгүй. 2014 онд өндөр дээд түвшинд  нарийн царигийн төмөр зам барина гээд тохиролцчихсон. Цаад тал Ганц модноос Бугат хүртэл 320 км төмөр зам тавьцан. Манайх сүүлд нь өргөн царигийн төмөр зам тавьсан. Энэ царигийн зөрүүнээс үүдэлтэй асуудал одоо яригдаж байна. Гашуунсухайт, Ганц модны дунд 13 км төмөр зам тавих юм байна. Огтлолцох цэгээ Ганцмод хийх үү, Гашуунсухайтад байх уу гэдэг асуудал үүссэн.

Засгийн газраас Гашуунсухайтын асуудлыг Сангийн сайдад хариуцуулсан. Гашуунсухайтыг хөгжүүлэх хөгжлийн төлөвлөгөө гаргаж, ойрын үед энэ боомтыг ямар түвшинд хүргэхээ одооноос тогтож байж, цааш явахгүй бол болохгүй байна. Гашуунсухайтад үүсээд байгаа өнөөдрийн хүндрэл бол ердөө л ковид. С зөвшөөрлийн асуудал, нүүрс гаргаж чадахгүй байгаагийн ганцхан шалтгаан нь ковид” гэсэн тайлбарыг өглөө.

Б.Хэрлэн