Хурдны зам тавигдана
Нийслэлийн Засаг дарга бөгөөд Улаанбаатар хотын захирагч Г.Мөнхбаяр уржигдар буюу өнгөрөгч бямба гаригт шинээр болон засвар шинэчлэл хийгдэх автозамын ерөнхий төлөвлөгөөтэй танилцлаа.
Энэ жил Яармагийн гүүрнээс Нисэх хүртлэх, Нисэх-Биокомбинат-Шувуун фабрик хүртэлх замын ажлыг эхлүүлэх юм байна. Энэхүү замын ажлын нийт төсөв нь 29 тэрбум орчим төгрөг зарцуулахаар төсөвлөжээ. Түүнчлэн шинэ замыг ирэх 2013 онд бүрэн ашиглалтад оруулах аж.
Яармагийн гүүрнээс Нисэх хүртлэх замын хувьд хоёр талдаа гурав гурван эгнээ бүхий нийслэл хотын өнгө төрхийг илтгэсэн хурдны зам тавих юм байна. Хурдны үндсэн зам нь Нисэхийн цагаан хаалганы орчмоос зүүн тийш эргэж, Яармагийн товчооноос Өлзийт хороолол хүртэл үргэлжлэх гэнэ.
Харин Нисэх хүрэх зам нь дөрвөн эгнээ болон үргэлжилнэ. Энэ жилийн замын ажлын хүрээнд нийслэлийн Шалган нэвтрүүлэх товчоодыг гарахдаа найм, орохдоо гурван гарц бүхий орчин үеийн пост болгон өөрчлөх юм байна.
Нийслэл хотод хийх дараагийн томоохон зам нь Дэнжийн 1000- Зурагтын эцэс хүртэлх 19 метрийн өргөнтэй шинэ зам. Эл замын ажлыг хийж гүйцэтгэхэд 70 гаруй айл өрх, обьект замын трасст орсон тул тэднийг нүүлгэн шилжүүлэх, байршлийг нь өөрчлөх аж. Иймд иргэд, аж ахуйн нэгжүүдийг замын ажил эхлэхэд саад учруулахгүй байхыг албаныхан сануулж байсан. Энэ онд нийслэлийн Автозамын газраас 43 багц тендерийг зарласан бөгөөд одоогийн байдлаар Дэнжийн 1000-аас Зурагтын эцэс хүртэлх замын ажлын гүйцэтгэгчийг шалгаруулсан байна.
Н.Дэлгэр
СЭТГЭГДЭЛ БИЧИХ