Монгол улсын иргэний цахим үнэмлэх ирэх сарын эхээр хэвлэлтээс гарах аж. Олон улсын стандартад нийцүүлэн хийсэн уг үнэмлэх нь Монгол Улсын төрийн билэг тэмдэг, далбаа, соёмбо, газрын зураг зэргийг байршуулсны зэрэгцээ гал, нар, сарыг дүрсэлснээрээ онцлогтой аж.

Шинэ иргэний үнэмлэхний нууцлал өндөр гэдгийг албаныхан мэдэгдэж буй. Тухайлбал, цахим үнэмлэх дээр байрлуулсан чип дээр тухайн хүнтэй холбоотой мэдээллийн санг байршуулсан байна.

Эхний удаад тус үнэмлэхийг хороогоор дамжуулан иргэдэд үнэ төлбөргүй олгохоор шийдвэрлэсэн. Цахим  үнэмлэхээ хаяж гээгдүүлсэн тохиолдолд дахин олгохдоо 10 мянган төгрөг төлж шинээр авах юм. Хуучин  иргэний үнэмлэх дээр хаягийн бүртгэл хийлгэхэд үнэмлэхд дээр  шинэ хаягийг нь наадаг байсан.  Харин шинэ цахим үнэмлэхтэй болсноор шилжилт хөдөлгөөн хийх тоолонд дахин шинэчлэхээр болжээ.  Иргэдэд үнэ төлбөргүй олгох цахим үнэмлэхний зургийг Иргэний шинэчилсэн бүртгэлийн үеэр авахуулсан зургийг байршуулахаар тогтсон. Тухайн үед бүртгэлийн ажилтнууд шаардлага хангахгүй зураг авсан хэмээн иргэд шүүмжлэлтэй хандаж байгаа юм.

Иймд цахим үнэмлэхээ үнэ төлбөргүй авсаны дараа зургаа солихыг хүсвэл дахин шинээр үнэмлэх захиалж болох гэнэ.

Н.Дэлгэр