Орос Украинд цөмрөн орсны төлөө Барууны орнууд ихээхэн өргөн цар хүрээтэй хориг тавьсан юм. Оросын төрийн оролцоотой компаниуд, банкууд төдийгүй иргэдэд ч зарим орон виза олгохооргүй болсон. 

Улс орнуудын ОХУ-ын эсрэг тавьсан хоригт энгийн иргэд нь ч өртөж эхэллээ

Эдгээр хоригууд нь Оросын хөрөнгийн зах зээлийг сүйрэлд хүргээд зогсохгүй Европ, АНУ-д ч сөрөг нөлөө үзүүлж, дэлхийн хөрөнгийн зах зээлийн тогтвортой байдалд заналхийлнэ гэж шинжээчид үзэж байгаа талаар "Нью-Йорк Таймс" мэдээлжээ.

Америкийн эрх баригчдын тавьсан хоригууд нь өндөр хөгжилтэй орнуудын эдийн засагт нөлөөлж, хөрөнгийн зах зээлийг аюулд учруулна гэж шинжээчид үзэж байна.

Жорж Вашингтоны их сургуулийн эрдэм шинжилгээний ажилтан Мария Снеговагийн үзэж байгаагаар Оросын эсрэг тавьсан хатуу хориг нь газрын тос, хийн үнэд өөрчлөлт оруулж, улмаар инфляцид нөлөөлөх гэнэ. Сүүлийн жилүүдэд маш өндөр төвшинд хүрсэн инфляци улам нэмэгдэнэ гэж тэрбээр үзэж байгаа аж. 

Оросын томоохон банкуудын эсрэг тавьсан хязгаарлалтууд нь Оросын эдийн засагт бүхэлд нь, иргэдийнх нь амьдралд ч нөлөөлнө гэж Төрийн департаментын албан хаагч асан Эдвард Фишман мэдэгдсэн байна.

Шинжээчдийн үзэж байгаагаар, рублийн ханш унасны улмаас хүнсний бүтээгдэхүүн, хувцас хэрэглэлийн үнэ нэмэгдэх аж.

Түүнчлэн Орос улс хариу хориг тавьж байгаа тул зөвхөн ОХУ биш бусад орнууд ч ихээхэн хохирол амсах нь ойлгомжтой болж байна. Тухайлбал, Британи Оросын "Аэрофлот" компанийн эсрэг хориг тавьсны хариуд Оросын агаарын тээврийн газар Британийн  онгоцуудыг агаарын орон зайдаа орохыг хориглосон байна.

Шинжээчдийн үзэж байгаагаар Британи, Орос улс харилцан хориг тавьснаар Британийн агаарын тээврийн компаниудад ихээхэн хохирол учрах гэнэ. Өөр зам сонгосноор нислэгийн цаг уртсах, түлшний үнэ нэмэгдэх, цалин хөлсний хэмжээ нэмэгдэхээс аргагүй болох аж. Ингэснээр, Оросын агаарын зам ашиглахгүй, өөр замаар нислэг үйлдэхэд урьд өмнөхөөсөө 10 мянган долларын илүү зардал гарна гэж шинжээчид үзжээ.

Британийн агаарын тээврийн компаниуд Азийн орнууд руу нислэг үйлдэхийн тулд Оросын агаарын орон зайг ашигладаг. Британи улс өдөр бүр 50 гаруй транзит нислэгийг Сибирийг дамнан үйлддэг аж. Харин ОХУ, Их Британийн хоорондын шууд нислэгийг "Аэрофлот" болон "British Airways" хариуцдаг.

Г.Бямбасүрэн