Барууныхан Оросын эсрэг хориг арга хэмжээ авч хэрэгжүүлэх бодлого баримталж байгаа нь Украины асуудлыг шийдэхгүй гэж Хятадын Гадаад хэргийн сайд Ван И мэдэгджээ. Энэ талаар Интерфакс мэдээлсэн байна.
"Хориг арга хэмжээнүүд нь асуудлыг шийдэж чаддаггүйн дээр улс төрийн зохицуулалтад саад болж, шинээр асуудал үүсгэдэг гэдгийг бодит байдал хэдийнэ харуулсан" хэмээн Ван И үзэж байгаа аж.
Түүнчлэн тэрбээр Европын орнуудын төлөөлөгчидтэй утсаар ярих үеэрээ Украины асуудлаарх БНХАУ-ын байр суурийг илэрхийлсэн талаар Синхуа агентлаг мэдээлжээ.
"Хятад улс Украины тусгаар тогтнол, нутаг дэвсгэрийн бүрэн бүтэн байдлыг хүндэтгэх, хамгаалахын төлөө хатуу зогсоно. Украин дахь өнөөгийн өнхцөл байдал нь Хятадын талын харахыг хүсээгүй нөхцөл байдал. Хятад улс Украины хямралыг энхийн замаар зохицуулах бүхий л дипломат хүчин чармайлтыг дэмжинэ" хэмээн Ван И мэдэгдсэн байна.
Үүнээс өмнө, баасан гарагийн үдэш Ши Жинпинь, Владимир Путин нар утсаар ярьж, улмаар энэ үеэр Путин Украины талтай хэлэлцээ хийхэд бэлэн гэдгээ илэрхийлж байв.
Г.Бямбасүрэн
| Уншиж байна |