Украины Ерөнхийлөгч Владимир Зеленский дайн эхэлснээс хойш тогтмол мэдэгдэл хийдэг болсон. Тэрбээр тавдугаар сарын есний үдэш хийсэн мэдэгдэлдээ, ЕХ-д элсэхэд чухал алхам хийсэн талаар болон Украинд дайн дэгдэж, газар тариалангийн бүтээгдэхүүн экспортлох боломжгүй болсон тул олон улс хүнсний хомстолд орохын даваан дээр байна гэж онцолжээ. 

"Өнөөдөр бид Европын холбоонд элсэх замдаа чухал алхам хийлээ. Украин улс ЕХ-ны гишүүн болох хүсэлтэй орон бүр бөглөх ёстой тусгай асуулгын хариултын хоёр дахь хэсгийг хүлээлгэн өгсөн юм. Үүнд ихэвчлэн олон сар шаардагддаг, Харин бид хэдэн долоо хоногийн дотор амжууллаа" хэмээн Зеленский мэдэгджээ.

Украин улс улаан буудайн томоохон экспортлогч бөгөөд өнгөрсөн онд гэхэд л дэлхийн улаан буудайн экспортын 10 хувийг дангаар хангаж байлаа. Харин энэ улсад дайн дэгдсэн нь зах зээл дээр 50 сая тонн улаан буудай дутагдаж, улмаар буурай орнуудад хүнсний хомстол нүүрлэж болзошгүй гэж НҮБ-ын анхааруулж байв. Энэ талаар Зеленский ч мэдэгдэлдээ онцолжээ. 

"Манай газар тариалангийн бүтээгдэхүүний экспорт зогссоноор дэлхийн олон бүс нутагт хүнсний хомстол нүүрлэх эрсдэл тулгараад байна. Цаашлаад нөхцөл байдал бүр аймшигтай болж мэдэх юм. Энэ бол Оросын түрэмгийллийн үр дагавар" хэмээн Владимир Зеленский мэдэгджээ.

Түүнчлэн тэрбээр энэ мэдэгдэлдээ эх орноо хамгаалж буй, түр хугацаанд эзлэн түрэмгийлэгдсэн хотуудад Оросын түрэмгийллийг эсэргүүцсээр байгаа украинчуудад талархал илэрхийлсэн байна.

Г.Бямбасүрэн