Коронавирусийн цар тахал болон Украин, Оросын дайнаас үүдэлтэйгээр Хятадад инфляци хурдацтай нэмэгдсэн байна. Улмаар инфляцийг тогтоон барих үүднээс БНХАУ нүүрс олборлолтыг нэмэгдүүлэх төлөвлөгөөтэй байгаа гэнэ. Энэ талаар БНХАУ-ын Улсын статистикийн газрын албан ёсны төлөөлөгч Фу Линхуэй ТАСС агентлагт ярьсан байна. 

"Нүүрс бол манай улсын эрчим хүчний гол түүхий эд. Энэ түүхий эд Хятадад их бий. Бид ихээхэн хэмжээгээр олборлох боломжтой. Бид нүүрс олборлолтыг тогтмол нэмэгдүүлснээр үнийн өсөлтийг тогтоон барина " хэмээн Фу Линхуэй мэдэгджээ.

Түүний өгүүлснээр, цар тахал болон Украины хямралын нөлөөгөөр эрэлт, нийлүүлэлт хүндхэн нөхцөл байдалд байгаа гэнэ. Эрчим хүчний түүхий эд болон хүнсний үнэ өсөж байгаа тул нүүрс олборлолтыг нэмэгдүүлж, нүүрсний үнийг зохих хэмжээнд байлгаснаар нүүрснээс үүдэлтэй эрчим хүч ашиглан үйлдвэрлэх бусад бараа бүтээгдэхүүний үнэд ч нөлөөлнө гэж тооцоолж байгаа аж. 

Г.Бямбасүрэн