Улаанбаатарт болох "Их дуулга" тэмцээнд Оросын тамирчдыг оролцуулахаар болсон шийдвэр гарсны хариуд Украины Жүдогийн холбоо Олон улсын жүдогийн холбооноос зохион байгуулсан бүх тэмцээн уралдаанд оролцохгүй байх шийдвэр гаргасан. Энэ шийдвэрийг Украины жүдочин Георгий Зантарая дэмжиж байгаагаа илэрхийлжээ. 

"Жүдо бол миний хувьд зөвхөн спорт төдий биш. Олон улсын жүдогийн холбооноос зохион байгуулсан бүх тэмцээнд оролцохгүй гэсэн шийдвэрийг Украины жүдогийн холбоо гаргасныг зөв шийдвэр гэж үзэж байна. Украины жүдогийн холбооны ерөнхийлөгч болон Үндэсний олимпын хорооны ерөнхийлөгч эх оронч байр суурьтай байгаад маш их талархаж байна" хэмээн Георгийн Зантарая фейсбүүк хуудсандаа бичжээ.

Өмнө нь тэрбээр Оросын тамирчдыг тэмцээнд оролцуулвал бүх цолноосоо татгалзана хэмээн мэдэгдэж байлаа. Олон улсын жүдогийн холбоо Оросын тамирчдыг холбооны нэрийн өмнөөс "Их дуулга" тэмцээнд оролцохыг зөвшөөрсөн юм.

"Улаанбаатар их дуулга"-д оросууд оролцвол дэлхийн аварга бүх цолоосоо татгалзана