Энэ сарын дундуур Оросын арми өргөн цар хүрээтэй пуужингийн довтолгоо хийсний улмаас нэг пуужин Днеприйн орон сууцны барилгыг сүйрүүлж, олон хүн амиа алдсан харамсалтай хэрэг гарсан. Ням гарагт дахин нэг пуужин орон сууцны барилга оносон талаар Украины эрх баригчид мэдэгджээ.

Тодруулбал, Оросын талаас пуужин харвасан гэж Харьковын эрх баригчид ням гарагийн үдэш мэдээлснийг "Эрх чөлөө" радио мэдээлсэн байна. Эрх баригчдын мэдэгдсэнээр, Оросын армийн харвасан нэг пуужин Харьков хотын төвд байх орон сууцны барилгыг оножээ. Үүний улмаас гэмтэж бэртсэн хүмүүс байгаа, хичнээн хүн гэмтсэн талаарх мэдээллийг тодруулж, газар дээр нь шуурхай албад ажиллаж байгаа гэж Харьков хотын захиргаа мэдэгдсэн байна. 

Украины эрх баригчдын мэдээлснээр, өмнө нь Оросын арми Украины хот, мужууд руу харвахад ашиглаж байсан С-300 зенит пуужинг энэ удаад ч харважээ. Мөн өдөр Херсон руу Оросын арми артиллериэр буудсаны улмаас гурван хүн амиа алдсан бөгөөд цохилтод эмнэлэг өртсөн байна. 

Г.Бямбасүрэн