АНУ-ын Тагнуулын төв газрын тэргүүн Уильям Бернс өнгөрсөн сард Орос, Украинд энхийн төлөвлөгөө танилцуулсан гэнэ. Энэ талаар холбогдох эх сурвалжаас авсан мэдээлэлтэйгээр Швейцарын  Neue Zurcher Zeitung сонин мэдээлжээ. 

Эх сурвалжийн мэдээлснээр, цэргийн ажиллагааг зогсоовол Украины газар нутгийн 20 хувийг Орост өгөх санал тавьсан гэнэ. Харин Украин, Орос энэ төлөвлөгөөг хүлээн аваагүй аж.

Тодруулбал, АНУ-ын Ерөнхийлөгч Жо Байдены санаачилгаар, Тагнуулын төв газрын тэргүүнд үүрэг өгч, энхийн төлөвлөгөөг танилцуулсан гэж Neue Zurcher Zeitung сонин бичсэн байна. Сонинд өгүүлснээр, нэгдүгээр сард Тагнуулын төв газрын тэргүүн Бернс нууцаар Москвад очжээ. Түүнийг нэгдүгээр сард Украинд нууцаар очиж, Зеленскийтэй уулзсан гэж өмнө нь Вашингтон Пост сонин мэдээлж байсан юм. 

Ийнхүү Зеленскийтэй уулзаж, Москвад нууцаар очих үеэрээ цэргийн ажиллагааг зогсоовол Украины нутгийн 20 хувийг өгөх санал тавьсан гэнэ. Харин сөргөлдөгч талууд энэ саналыг хүлээж аваагүй аж. Украины эрх баригчид газар нутгаа хуваахыг хүсээгүй бол Оросын эрх баригчид "ямар ч тохиолдолд урт хугацаандаа дайнд ялна" гэдэгтээ итгэлтэй байгаа тул саналыг хүлээж аваагүй гэж  NZZ сонин бичжээ. Ингээд энхийн төлөвлөгөө бүтэлгүйтмэгц Байден Украинд Абрамс танк өгөхөөр шийдсэн гэж сонины нийтлэлд онцолсон байна.

Энэ мэдээлэл гарсны дараа АНУ-ын Тагнуулын төв газрын нэрээ нууцалсан эх сурвалж Newsweek сонинд энэ мэдээллийг "ор үндэсгүй" хэмээсэн байна. Түүнчлэн АНУ-ын Аюулгүйн зөвлөлийн хэвлэлийн нарийн бичгийн даргын орлогч Шон Деветт дээрх мэдээллийг няцаасан бол Орос, Украины албаны этгээдүүд одоогоор ямар нэг тайлбар хийгээгүй байгаа юм.

Г.Бямбасүрэн