ОХУ Украин руу халдаж, өнөөгийн дайныг дэгдээснээсээ хойш эрүүгийн хуулиндаа өөрчлөлт оруулан, иргэдийн үг хэлэх эрх чөлөөг боомилж, дайн эсэргүүцсэн иргэдийг торгох, саатуулах, тэр бүү хэл хорих ялаар шийтгэсээр байгаа юм. Энэ удаад утсаар ярьсных нь төлөө нэгэн цагдааг шийтгэжээ. 

Мөрдөн байцаагчдын үзсэнээр, Москвагийн цагдаагийн газрын алба хаагч асан Семиэл Ведель (Сергей Клоков) 2022 оны гуравдугаар сард Дотоод хэргийн яамны нийслэлийн хэсэгт техникчээр ажилалж байхдаа найзуудтайгаа утсаар ярихдаа дайн эсэргүүцэж, Оросын эрх баригчид амиа алдсан хүмүүсийн тоог дарж хэлж байна хэмээгээд Оросыг "алуурчин орон" хэмээн нэрлэсэн гэнэ. Ингээд түүнийг Оросын армийн талаарх худал мэдээлэл түгээсэн хэргээр жирийн дэглэмтэй хорих ангид долоон жил хорих шийдвэрийг шүүх гаргасан байна. Түүнчлэн хууль сахиулах байгууллагад дөрвөн жил ажиллахыг хоригложээ. 

Мөрдөн байцаагчид шалгагдаж байсан сэжигтэн мөрдөн байцаалтаас зугтах үедээ гурван цагдаагийн аминд хүрсэн хуучны хэргийг шалгах үеэрээ цагдаагийн утсыг сонсож байсан бөгөөд ийнхүү утсыг нь чагнахдаа дайн эсэргүүцсэн яриаг олж сонссон аж. Цагдаагийнхныг хөнөөсөн хэрэг 20 жилийн өмнө болсон, Ведель энэ хэргийн талаар ямар нэг зүйл мэдэж байж болзошгүй гэж мөрдөн байцаагчид үзсэний улмаас түүний утсыг чагнаж байжээ.

Г.Бямбасүрэн