ОХУ Украинд дайн өдүүлсний дараа зэр зэвсгийн нөөцөө шавхаж, улмаар Хойд Солонгосоос төрөл бүрийн зэвсэг авч байгаа талаарх мэдээлэл гарсаар ирсэн. Энэ удаад Ким Жон Ун ОХУ-д айлчилсан нь ч зэвсгийн хэлэлцээр хийхтэй холбоотой гэж хэвлэлүүд мэдээлж байв.ОХУ Хойд Солонгосоос зэвсэг авч, үүнийгээ Украины эсрэг дайнд ашиглаж байгаа гэдгийг Өмнөд Солонгос эртнээс л баталж байгаа гэж Өмнөд Солонгосын Ерөнхийлөгчийн захиргаа мэдэгджээ.

"Энэ талаар ярихад хүнд, учир нь тагнуулын асуудал энд яригдана. Гэхдээ Хойд Солонгосоос нийлүүлсэн зэвсгийг Орос Украины  эсрэг дайнд ашиглаж байгааг бид аль эрт батласан" хэмээн Өмнөд Солонгосын Ерөнхийлөгчийн захиргааны төлөөлөгч мэдэгджээ. 

Түүнчлэн тэрбээр Ким Жон Уны Орос дахь айлчлал үргэлжилж байгаа тул Ким Жон Ун, Владимир Путин нарын дээд хэмжээний уулзалтын дүнг одоо дүгнэх нь эрт хэмээн мэдэгдсэн байна.

"Бид Ким Жон Уны айлчлалтай холбоотой үйл явдал, үр дүнг анхааралтай ажиглаж байна. Мөн АНУ, Япон бусад холбоотнуудын хамтаар  авч хэрэгжүүлж магадгүй олон талт хариу арга хэмжээний талаар хэлэлцэж байгаа" хэмээн Өмнөд Солонгосын Ерөнхийлөгчийн захиргаа мэдэгджээ.

Энд дуулгахад, Хойд Солонгосын тэргүүн Ким Жон Уны ОХУ-д хийх албан ёсны айлчлал есдүгээр сарын 13-ны өдөр эхэлсэн. Тэрбээр айлчлалын хүрээнд Восточный сансарын буудал дээр Путинтэй уулзаж, тэд хэлэлцээр хийсэн юм. 

Г.Бямбасүрэн