Монгол Улсын 34 дэх Ерөнхий сайдаар Гомбожавын Занданшатар өнөөдөр томилогдох нь нэгэнт тодорхой болсон. Харин түүнтэй хамт ажиллах шинэ Засгийн газрын сайд нарын нэрс урьдчилсан байдлаар цацагдаж, дараагийн төрийн хүчний тэнцвэр, эрх мэдлийн урт стратеги хэрхэн зурагдсаныг харуулж байна. 

Энэ бол зүгээр нэг “шилжилтийн кабинет” биш. Энэ бол МАН-ын дотоод эрх мэдлийн зураглалын шинэчлэл, У.Хүрэлсүхийн 2027 оны Ерөнхийлөгчийн кампанит ажилд суурь тавих, Тогтвортой мэт боловч цэгцлэх шаардлагатай бүтцийн дахин зохион байгуулалт юм.

Доорх сайд нарын урьдчилсан нэрс дээр тулгуурлан шинэ Засгийн газрын бодлого, фракц хоорондын тэнцвэр, улс төрийн мессэжийг уншъя.

 ЗГХЭГ-ын дарга С.Бямбацогт

Хүчтэй парламентч, Хууль зүйн сайдаар ажиллаж байсан туршлагатай. ЗГХЭГ бол Засгийн газрын тархи, парламент, Ерөнхийлөгчтэй харилцах төв зангилаа. Түүнийг энэ албан тушаалд тавьж буй нь:

• Г.Занданшатарын зөөлөн институцийн логикийг
• Хүрэлсүхийн хатуу фракцын хяналттай хослуулах гэсэн хос зарчимт хяналт юм.

С.Бямбацогт улс төрийн карьертаа дараагийн алхам хийх гэж буй. Түүнийг 2026 оноос Шүүхийн шинэчлэл, Үндсэн хуулийн өөрчлөлтийн багийг ахална гэсэн таамаг бий.

 Боловсрол, ШУ-ны сайд Л.Энх-Амгалан

Тогтвортой ажилласан цөөн сайдын нэг. Боловсролын салбарт байгууллагын реформ биш, бодлогын дараалал оруулсан хүн. Л.Энх-Амгаланг дахин сайдаар томилж буй нь “тууштай реформ” хийхийг уриалж буй дохио. Гэхдээ шинэ ЗГ бүтцийн хэмнэлт, багц санхүүжилтийн хязгаарлалттай нүүр тулна. Өөрөөр хэлбэл, реформ + хэмнэлт = сорилт.

Хууль зүйн сайд Л.Мөнхбаяр

Тун сонирхолтой томилгоо. Хууль зүйн яам бол шүүх, прокурор, ЦЕГ, АТГ гэх мэт томоохон институциудын нөлөөлөлд төвлөрсөн “системийн артер”. Л.Мөнхбаяр бол Хэнтийн баг, У.Хүрэлсүхийн итгэлт хүн.

Улстөрийн “томчуудын” хэргүүдийн шийдвэрлэл удааширч буй энэ үед “хүнд” салбар руу залуу, эрсдэл үүрэх хүн тавьж буй нь золиос байж ч мэдэх юм.

Сангийн сайд – Б.Жавхлан

Эдийн засаг хариуцсан гол реформч. Л.Оюун-Эрдэнийн танхимын үеийн “Хөгжлийн бодлого”-ын нүүр царай. Г.Занданшатар реформ хийж эхэлнэ гэж үзвэл хамгийн түрүүнд Б.Жавхлан  Төсвийн тодотгол хослол хэрэгтэй. Гэхдээ Б.Жавхланд Л.Оюун-Эрдэнийн Засагт зуурсан ‘’бантан’’ их. Одоо үүнийгээ өөрөө цэвэрлэх цаг нь.

Зам тээврийн хөгжлийн сайд  Б.Дэлгэрсайхан

Бизнесийн орчин, дэд бүтцийн салбарт танигдсан. Говийн бүсийн төлөөлөл, намын санхүүгийн гол суурьтай хүн. Түүнийг энэ салбарт дахин тавьж буй нь инфраструктур + санхүүжилт + бизнесийн гэрээний шугам гэсэн гурвалын тэнцвэрийг барих гэсэн оролдлого байж болох л юм.

 Соёл, спортын сайд Д.Бум-Очир

Маш шинэлэг томилгоо. Хөнгөн салбар мэт боловч 2025 онд олон нийтийн PR, залуусын чиг хандлагын удирдлага гэх мэт стратегийн “зөөлөн хүчний” төв болно. Соёлын салбарт дотоод бодлогоос илүүтэй “нүүр царай” чухал болох тул софт улс төрийн дүр төрх бүрдүүлэх зорилго агуулна байх.

Аялал жуулчлалын сайд Г.Дамдинням

Энэ салбар 2025–2026 онд эдийн засгийн орлогын шинэ “бааз” болохоор төлөвлөгдөж буй. Түүнийг тавьснаар аялал жуулчлалд инноваци + шинэ менежмент оруулна гэсэн мессэж өгч байна.

 Батлан хамгаалахын сайд Э.Бат-Амгалан

Туршлагатай, МАН дотор төвийг сахидаг, үндэсний аюулгүй байдлын байр суурьтай улстөрч. Цэргийн реформ биш, стратегийн ухаалаг тэнцвэр барих үүрэгтэй сайд.

Нийгмийн хамгааллын сайд Ч.Ундрам

Олон улсын боловсролтой, нийгмийн халамж, тэтгэвэр, хөдөлмөрийн реформ зэрэг “тэсэрч мэдэх” хариуцлагатай салбарын гол менежер.

 Гадаад харилцааны сайд Д.Цогтбаатар

МАН-ын дотоодод "тулгуур дипломат" хэмээн нэрлэгддэг. Туршлага ихтэй, геополитикийн нарийн тэнцвэрийн хүн. Монгол–Орос, Монгол–Хятад–Барууны гурвалсан гадаад бодлогыг “протоколын биш, прагматик” чиглэл рүү шилжүүлж мэднэ.

 Эдийн засгийн хөгжлийн сайд Х.Ганхуяг

Залуусын төлөөлөл. Финтек, хөрөнгө оруулалт, стартап экосистемийн тухай мэдлэгтэй. Түүнийг тавих нь МАН-ын дараагийн үеийн лидерүүдэд итгэл үзүүлж буй дохио.

 Эрчим хүчний сайд Ч.Чойжилсүрэн

ДЦС-3 дээр гарсан золгүй явдалд ёс зүйн хариуцлага хүлээнэ гэдгээ мэдэгдсэн ч Г.Занданшатарын кабинетад нэрс нь яригдаж буй гишүүдийн нэг.

Г.Занданшатарын танхимд орж буй хүмүүсийг харахад нэг зүйл тодорхой байна.
Энэ бол "дараачийн сонгуульд ялахын төлөөх шоу"-ны бүрэлдэхүүн биш,
Тогтвортой байдал + институцийн шинэчлэл + эрх мэдлийн хяналттай тэнцвэрийг зэрэг барих гэсэн урт стратегийн бүтэц.

Хэрвээ эдгээр сайд нар бодит үр дүн үзүүлж чадвал Г.Занданшатарын танхим зөвхөн түр хугацааны кабинет биш, 2027 оны Ерөнхийлөгчийн сонгуулийн өмнөх оноо авчрах гол тоглогчид болох учиртай юм.