Өнөөдөр /2025.06 24/ Ерөнхий сайд Г.Занданшатар Монгол Улсаас хилийн чандад суугаа Элчин сайд нартай цахим уулзалт хийв. Уулзалтын агуулгаас харахад Засгийн газар гадаад бодлогын салбарт дорвитой өөрчлөлт хийх дохио өгч, дипломат албыг зүг чигтэй, үр дүнтэй ажиллуулах талаар үүрэг, хариуцлагын шинэ загвар руу шилжиж эхлэх нь гэж харагдав.

Уламжлалт утгаараа дипломат төлөөлөгчийн газар гэдэг улс орны нэр хүнд, үндэсний язгуур ашиг сонирхлыг хамгаалах, харилцаа дипломат түвшинд тогтоох үүрэгтэй. Харин энэ удаагийн уулзалтаар Ерөнхий сайд тэднээс зөвхөн протоколын харилцаа биш, шударга бөгөөд үр дүнтэй эдийн засгийн бодит үр нэхэж буй нь анхаарал татав.

Тэрбээр хөрөнгө оруулалт татах, экспорт нэмэгдүүлэх, төлбөрийн тэнцлийн алдагдлыг бууруулахад чиглэсэн бодлогын “фронтын шугам”-д дипломатчдыг татан оролцуулж буйгаа ил тод мэдэгдлээ. Нэг үгээр хэлбэл, элчин сайд нар зөвхөн “гайхамшигтай илтгэлтэй” байхаа больж, гайхамшигтай үр дүн гаргах ёстой боллоо.

Сүүлийн жилүүдэд Монгол Улсын гадаад бодлого салбарын дотоод зөрчил, уялдаа холбоо сул байдалтай байсныг мэргэжилтнүүд шүүмжилж ирсэн. Харилцан зөвшилцөлгүй уулзалтууд, олон улсын тавцанд илэрхийлсэн байр суурь зөрөх нь улс орны бодлогын нэр хүндэд сэв суулгаж иржээ.

Ерөнхий сайд энэ эмх замбараагүй байдлыг цэгцлэхээр “нэг цонхны зарчим”-ын дагуу Гадаад харилцааны яам, бусад салбарын яамд хоорондоо уялдаатай, ил тод, зөвшилцсөн байдлаар ажиллахыг үүрэг болголоо. Энэ нь гадаад бодлогыг “түрэмгий” биш, гэхдээ тууштай, тооцоотой, мэргэжлийн түвшинд явуулах алхам гэж харагдаж байна.

Олон улсын харилцаанд сүүлийн жилүүдэд тогтворгүй, хурцадмал нөхцөл байдал давамгайлж буй энэ үед Монгол Улс хоёр хөрштэйгөө төдийгүй гуравдагч хөршүүдтэй тэнцвэртэй, бие даасан харилцааг баримтлах зарчмаа бат нот барьж явах нь зайлшгүй шаардлагатай. Гэвч энэ тэнцвэр нь үлгэрийн биш, бодитой тооцоолсон, санаачилгатай дипломат ажиллагаагаар л хэрэгжих боломжтой.

Монголын гадаад бодлого өнөөдөр зөвхөн нэр хүнд биш, эдийн засгийн амьдралаар хэмжигддэг цаг үе рүү орж байна. Ерөнхий сайдын зүгээс элчин сайд нарт өгсөн чиглэлүүдийг харвал дипломатчид улс орны бодлого хэрэгжүүлэгч “эдийн засгийн элч” болох үүрэг хүлээж буй нь тодорхой.

Төрийн хэмнэлтийн бодлого, бүтцийн өөрчлөлттэй зэрэгцэн хэрэгжиж буй энэхүү шинэ хандлага нь гадаад бодлогыг илүү цэгцтэй, уялдаа холбоотой, бодит үр дүнд чиглэсэн болгох стратегийн алхам уу? Эсвэл түр зуурын идэвхжил, дотоод зохион байгуулалтын өнгөц тохируулга төдий зүйл үү? үүнийг бодит үр дүн, хэрэгжилтийн явц л тодорхойлох болно.