ХААН Банк Европын сэргээн босголт, хөгжлийн банктай (ЕСБХБ) 20 сая ам.долларын урт хугацаат санхүүжилтийн гэрээ байгууллаа. 

Тус санхүүжилтийг хөдөө аж ахуйн салбарын бичил болон жижиг, дунд бизнес эрхлэгчид, мөн хөдөө аж ахуйн өртгийн сүлжээний оролцогч,  хөдөө аж ахуйн үйлдвэрлэл эрхлэгчдийг дэмжих, санхүүгийн хүртээмжийг нэмэгдүүлэхэд зарцуулах юм. Мөн тусгайлан бэлтгэгдсэн зөвлөх баг ХААН Банканд хөдөө аж ахуйн санхүүжилтийг дэмжих, сургалт, борлуулалт, маркетинг зэрэг чиглэлээр мэргэжлийн зөвлөмж, дэмжлэг үзүүлснээр зорилтот харилцагчдыг хамтарсан сургалтанд хамруулж, санхүүжилтийн хүртээмжийг нэмэгдүүлэхэд бодитой хувь нэмэр оруулахаар зорьж буй.

Ташрамд дурдахад, өнгөрсөн 5-р сард ХААН Банк ЕСБХБ-наас “Эмэгтэй бизнес эрхлэгчдийг дэмжих хөтөлбөр (WiB)” болон “Монголын ногоон эдийн засгийг санхүүжүүлэх хөтөлбөр (MonGEFF)”-ийн хүрээнд 145 сая ам.долларын санхүүжилт татан төвлөрүүлсэн билээ. Энэ нь ЕСБХБ-наас Монголын санхүүгийн байгууллагад олгосон хамгийн өндөр дүнтэй санхүүжилт болсон төдийгүй Монгол Улсад тогтвортой хөгжил, байгаль орчинд ээлтэй эдийн засгийг дэмжих зорилготой хоёр томоохон хөтөлбөрийг хамтын ажиллагааны хүрээнд хэрэгжүүлж байгаагаараа онцлог юм.

ХААН Банк ЕСБХБ-тай 2007 оноос өнөөдрийг хүртэл урт хугацаанд хамтын ажиллагаагаа өргөжүүлж ирсэн. Энэ удаа ЕСБХБ-наас хөдөө аж ахуйн чиглэлийн санхүүжилтийг Монголд анх удаа олгож буй бөгөөд ХААН Банкийг салбартаа төдийгүй Монгол Улсын тогтвортой эдийн засгийн хөгжилд тэргүүлэгч гэдгийг дахин бататгасан үйл явдал боллоо.

ХААН Банкны тухай

Монгол Улсын тэргүүлэгч ХААН Банк нь орон даяар нийт 548 салбар нэгж болон цахим сувгуудаараа дамжуулан Монголын нийт хүн амын 82 хувьд буюу 2.9 сая харилцагчдадаа, мөн бичил болон жижиг, дунд бизнес эрхлэгч, томоохон аж ахуйн нэгжийн харилцагчдадаа банк санхүүгийн цогц үйлчилгээг найдвартай хүргэж, харилцагчдынхаа өсөж хөгжих, урагшлах санхүүгийн аяллын алхам бүрд хамт байж ирсэн билээ. ХААН Банк нь тогтвортой санхүүжилт, цахим банкны инновац болон санхүүжилтийн хүртээмжийг нэмэгдүүлэх чиглэлд мөн салбартаа тэргүүлсээр байна. 

Европын сэргээн босголт, хөгжлийн банкны тухай

ЕСБХБ нь гурван тивийн 42 эдийн засагт хувийн хэвшлийн хөгжил болон бизнесийн санаачилгыг дэмжин ажилладаг олон улсын санхүүгийн байгууллага бөгөөд Европын холбоо, Европын хөрөнгө оруулалтын банк (EIB) болон нийт 77 гишүүн орны эзэмшилд багтдаг. ЕСБХБ-ны хөрөнгө оруулалтын үндсэн зорилго нь үйл ажиллагаа явуулж буй бүс нутгийн эдийн засгийг өрсөлдөх чадвартай, сайн засаглалтай, ногоон, хүртээмжтэй, тэсвэртэй бөгөөд нэгдмэл болгоход оршдог. Монгол Улсад ЕСБХБ нийт 2.55 тэрбум гаруй еврогийн санхүүжилт олгож, 160 төсөл хөтөлбөрийг амжилттай хэрэгжүүлээд байна. Энэхүү санхүүжилтийн 90 орчим хувь нь хувийн хэвшлийн компаниудыг дэмжихэд зориулагдсан юм.