УИХ-ын нэгдсэн чуулганы хуралдаанаар өчигдөр шинэ сайдуудыг  томилсон.Хамтарсан засгийн газраас ардчилсан намынхан сайдуудаа татаж авснаар тэдний оронд хэн томилогдох бол, ерөнхийлөгч тэднийг хүлээн зөвшөөрөх эсэх гээд олны анхаарлыг татаж байсан асуултууд хариулттай боллоо. Тухайлбал сайдаа хүлээж байсан зургаан салбарын дотор иргэдээс хамгийн их шүүмжлэл хүртэж байдаг салбар бол эрүүл мэнд байдаг юм. Энэ салбарын сайдаар томилогдож байсан хүмүүс зүү барьж өвчтөнд  тариа ч хийж үзээгүй хэр нь сайдын сэнтийд заларлаа хэмээн  хэвлэлийн хуудаснаа “элдвээрээ” дуудуулах нь элбэг. Харин энэ удаад салбараа удирдах болоод байгаа Н.Хүрэлбаатар сайдын хувьд салбартаа олон жил ажиллаж байгаа нэгэн юм. Зарим нэг нь түүнийг эрүүл мэндийн салбараа мэддэг хүн томилогдож байна гэж сайшаах ч  олон жил ажиллаж байгаа хэрнээ хйиж гавшсан зүйл нэг их байхгүй гэж шүүмжлэх нь олон. Юутай ч нам дагаж Н.Хүрэлбаатар даргын ам тосдлоо гэж зарим эх сурвалж дүгнэж  байгаа юм. Түүний хувьд  1991 онд Анагаах ухааны их сургууль төгссөн анагаах ухааны доктор, профессор цолтой нэгэн. Мэргэжил дээшлүүлсэн байдлыг нь аваад үзвэл гадаадын олон оронд вирус судлал, элэг судлалын чиглэлээр суралцаж байжээ. Хамгийн сүүлд 2006 онд БНСУ-ын Олон улсын вакцин судлалын төвд Дархлаажуулалтын чиглэлээр мэргэшжээ. Харин ажлын туршлагын хувьд асрагчаас ажлынхаа гарааг эхэлж байсан байх юм. Тодруулбал 1984-1985 онд Хавдар Судлалын Төвийн Сэхээн амьдруулахын тасагт асрагч хйиж байсан байна. Харин 1991-1992 оны хооронд Дорноговь аймгийн Аймаг сумын сум дундын нэгдсэн эмнэлэгт мэс заслын эмчээр томилогджээ. Түүнээс хойш 2003 он хүртэл Анагаах Ухааны Их Сургуульд багшилж байсан бол 2007 онд ажлынхаа анхны гарааг эхлүүлж байсан Хавдар Судлалын Төвийнхөө дэд захирлын албан тушаалд томилогдож байсан түүхтэй. Төрийн нарийн бичгийн дарга гэдэг албан тушаалд 2009 оноос хойш тухалж, өчигдрийг хүртэл ажиллаж байсан юм. Энэ бүхнээс үзэхэд салбартаа ёстой нэг туг ч барьж, тугал ч хариулж байсан юм уу гэж дүгнэж болохоор байгаа юм. Гэхдээ үе үеийн сайд нар эрүүл мэндийн салбар хөгжиж байна, ахиц дэвшил гарч байгаа гэдэг ч Монголынхоо эмч нарт итгэхгүй гадаад явж эмчилгээнд орох нь их байдаг. Тиймээс Н.Хүрэлбаатар сайдын хувьд Монголынхоо эмч нарыг “шүтэж”, мөн Монголынхоо эмнэлгүүдэд олон шинэчлэл хйигээсэй гэж хүсэх иргэд олон байна. Сайдаа цаана чинь нэгдүгээр төрхийнхөн өөрөөрөө төрвөл 400 мянга, кесарево хагалгаанд орвол 300 мянган төгрөг нэхэж суугаа сураг байна лээ шүү. Б.Хулан