Орон сууцны айлуудын пар, шугам задарч доод давхар луугаа ус алдаж, оршин суугчдыг хохироох хэрэг нилээдгүй гардаг. Гэтэл дээд давхарын айл ус алдсанаас цахилгааны утас шатаж гал гаран гурван хүн угаартсан хэрэг өчигдөр гарчээ. Тодруулбал, өчигдөр 17.00 цагийн орчим Баянгол дүүргийн V хороо  дөрөвдүгээр байр, нэгдүгээр орцны шиттэй өрөөнд амьдардаг айлын дээд давхараас ус алдан цахилгааны шитэд гал гарчээ. Энэ үеэр шит бүхий өрөөнд түрээсээр амьдарч байсан иргэн Ц-гийн эд зүйл шатаж, гэрт байсан 17-19 насны хоёр хүүхэд болон оршин суугчид галын аюулаас үүдэлтэй утаанаас гарч амжсан аж. Аврах гал унтрах ангийнхан дуудлагын дагуу ажиллаж галыг унтраан уг орцны оршин суугчдыг аюулгүй байгаа эсэхийг шалгах явцад нийт 24 иргэнийг утаажилтын бүсээс аварч гаргажээ. Мөн угаартсан 2-4 насны хоёр хүүхэд, нэг том хүнийг эмнэлгийн байгуулагад хүлээлгэн өгчээ. Уг гал гарсан шалтгаан нөхцлийг шалгаж байгаа хэдий ч урьдчилсан дүгнэлтээр ус алдсанаас үүдэн шитэнд богино холбоо үүсэн гал гарсан хэмээн дүгнэжээ. Н.Дэлгэр