АНУ-ын тэргүүн хатагтай Мишель Обама Гиннесийн дээд амжилтын номд бичигдэхээр амжилт гаргажээ. Гэхдээ үнэндээ бол тэр ганцаараа биш өөр 400 хүүхдийн хамтаар Цагаан ордоны цэцэрлэгт хүрээлэнд минутын турш зэрэг үсэрсэн амжилтаараа дээд амжилтын номд орсон юм. Америкийн Ерөнхийлөгчийн эхнэр Гиннесийн номд орохын тулд л 400 хүүхэд цуглуулж үсэрсэн гэвэл арай хэтэрсэн хэрэг болох биз. Ингэж үсрэхэд нэгэн шалтгаан байсан нь сүүлийн үед их идэж, эрчимтэй таргалах болсон залуусаа үргэлж хөдөлж, эрүүл амьдралын хэв маягтай явахыг уриалах явдал байж. Гэхдээ зүгээр нэг үсрээд зогсохгүй Гиннесийн номд орчихыг Мишель Обама илүүд үзсэн ажээ. Гиннесийн номын мэргэжилтнүүдийн өгүүлснээр Америкийн тэргүүн хатагтай яг нэг минут үсэрсэн байна. “Би улсын тэргүүн хатагтай болохоор олон л зүйлийг хийж үзэх хэрэгтэй болж байна. Гэхдээ ийм сонирхолтой алхам хийнэ гэж төсөөлж ч байсангүй. Гиннесийн дээд амжилтын номд орчихно гэж өмнө нь бодож ч үзээгүй” гэж Мишель Обама хэлжээ.

Р.Гэгээ