Засгийн газар энэ хавар 12 мянган тонн нөөцийн мах зах зээлд гаргах шийдвэр гаргасан. Ингэхдээ малчдаас мах худалдан авдаг компаниудын 12 мянган тонн махны киллограм тутамд 800 төгрөгийн урамшуулал олгоод 3700 төгрөгөөр зарахаар тохирчээ. Энэ тохиролцоонд тулгуурлан нөөцийн мах бэлтгэсэн компаниуд цагаан сарын өмнө 4000 тонн мах зарсан гэдэг. Гэвч ихэнх нь махаа худалдаанд гаргалгүй ченжүүдэд нууцаар өгч 6000 төгрөгөөр зарзаруулаад байгаа аж. Махны бизнес эрхэлдэг компаниуд 2011 онд 120 тэрбум төгрөгийн мах худалдан авсан гэж мэдээлснээс үзвэл одоо 100 гаруй мянган тонн мах байх бололцоотой. Өнөөдрийн байдлаар нөөцийн үхрийн мах 3700, хонь 3200, ямаа 2600 төгрөгөөр борлуулагдаж байгаа. Монголын махны холбооны нарийн бичгийн дарга И.Баттогтох “Манай холбооны удирдах зөвлөл хуралдаад махны үнийг шинэчлэн тогтоосон. Үхрийн мах киллограм нь 5500, ямааны мах 4000, хонины мах 5100 болгохоор шийдсэн. Харин хотын захиргааны зүгээс ямар нэг зөвшилцөл, хариу хэлээгүй байгаа учраас зарлаагүй байна” гэлээ. С.Жигүүр