Нийслэлийн Засаг даргын Тамгын газрын Хууль зүйн хэлтсээс санаачлан Монгол Улсад Хууль зүй, дотоод хэргийн алба үүсч хөгжсөний 100 жилийн ой, нийслэл хот үүсч байгуулагдасны 372 жилийн ой, Олон улсын хүний эрхийн өдрийг угтаж нийслэлийн Засаг даргын Тамгын газар, Захирагчийн ажлын албаны алба хаагчдын нийслэл хотод тулгамдаж буй асуудлын тухай болон хүний эрхийг хангах, хамгаалах чиглэлээр мэдлэгийг дээшлүүлэх, Монгол Улсад Хүний эрхийг хангах үндэсний хөтөлбөр, нийслэлийн төлөвлөгөөний биелэлтийг эрчимжүүлэх зорилгоор мэтгэлцээний тэмцээнийг өчигдөр зохион байгууллаа. Мэтгэлцээний тэмцээнд албан хаагчид Нийслэлийн эрх зүйн байдлын тухай хуулийн шинэчилсэн найруулгын төсөл, Монгол Улсад Хүний эрхийг хангах үндэсний хөтөлбөр, Нийслэлийн Засаг даргын мөрийн хөтөлбөр,  эдийн засаг, нийгмийн зорилтын хүрээнд тулгамдаж буй асуудлуудаар мэтгэлцлээ. Тухайлбал, Оршин суугчдын татварын тогтолцоог бий болгосноор хотын хүн амын тоо буурна. Нийслэлийн гэр хорооллыг барилгажуулахын тулд гэр хорооллын айлуудын газрыг албадан хураах нь зөв. Хотын агаарын бохирдлыг бууруулахын тулд нүүрснээс татгалзах ёстой. Архины үнийг нэмэх, үйлдвэрийн тоог багасгах нь архидалт багасгахад нөлөөлнө. Орон нутгаас хот руу явагдах шилжилт хөдөлгөөнийг хязгаарлах ёстой. Төрийн байгууллагууд болон захуудыг хотоос гадагш гаргаснаар хотын ачаалал багасна. Хотын иргэд гудамж зам талбай нийтийн эзэмшлийн байгууламжийг бохирдуулсан этгээдийг илрүүлж мэдээлсэнийхээ төлөө  урамшуулал авах ёстой. Нийслэл хот санхүүгийн хувьд бие даасан байх ёстой. Нийслэлийн Иргэдийн Төлөөлөгчдийн хурал байнгын ажиллагаатай байх хэрэгтэй зэрэг асуулт тавьж багууд хоорондоо мэтгэлцсэн юм.