МАХН-ын дарга Н.Энхбаярыг Авлигатай тэмцэх газраас баривчлах үеэр буюу энэ сарын 14-ны өдөр Хан-Уул дүүргийн 11 дүгээр хороо Мянганы сорилтын сангийн байрны орчимд эмх замбараагүй байдал үүсгэн, үүргээ гүйцэтгэж байсан цагдаагийн алба хаагчдыг хэл амаараа доромжлон, биед нь халдсан нэр бүхий иргэдэд Захиргааны хуульд заасан журмын дагуу арга хэмжээ авчээ.
Тухайлбал, Захиргааны хуулийн 30 дүгээр зүйлийн 30.2-т зааснаар МАХН-ын оюутны холбооны удирдах зөвлөлийн гишүүн А.Шагжаа, Н.Насанжаргал нарын гурван иргэнд торгуулийн арга хэмжээ авсан байна. Түүнчлэн иргэн Д.Баянсэлэнгэ, МАХН-ын дэргэдэх Оюутны холбооны дарга Д.Мөнхбаяр, Эрс шинэчлэл хөдөлгөөний тэргүүн Б.Энхбат нар нь энэ сарын 14-15-нд Сүхбаатар дүүргийн Засаг даргын зөвшөөрөлгүйгээр буюу Жагсаал цуглаан зохион байгуулах тухай хуулийн 9 дүгээр зүйлийн 9.1-д заасныг зөрчиж жагсаал цуглаан зохион байгуулсан гэдэг үндэслэлээр тус дүүргийн шүүхээс арга хэмжээ авчээ.
Ингэснээр МАХН-ын дэргэдэх Оюутны холбооны дарга Д.Мөнхбаярыг 20.000, Эрс шинэчлэл хөдөлгөөний тэргүүн Б.Энхбатыг 30.000 төгрөгөөр торгож, иргэн Д.Баянсэлэнгийг 14 хоног баривчилан байна.
Д.Цэцэг