УИХ-ын гишүүн ХЗДХ-ийн сайд Ц.Нямдоржийг огцруулах эсэх асуудал энэ өдрүүдэд улс төрийн халуун үйл явдлуудын нэгд тооцогдож байна. Энэ сэдвийн хүрээнд улс төрийн хүрээнийхний санал нэгдэж буй зүйл нь Ц.Нямдорж яг одоо өөрийн саналаар ажлаа өгөх нь хуулийн салбарын толгойд 20 гаруй жил ажилласан түүнд илүү ашигтай. Намын бүлгийн есөн гишүүн нь түүнийг Засгийн газраас гаргах санал тавьж, үүнийг АН-ын бүлгийн 27 гишүүн дэмжиж буйгаа илэрхийллээ. Эдгээр 36 гишүүн энэ долоо хоногт хуралдах УИХ-ын нэгдсэн чуулганаар эрхэм сайдыг огцруулах кноп дарвал сонгууль дөхөж байгаа өдрүүдэд МАН-ын лидерын нэр төрд “цөвтэй”. Хэрэв ийм зүйл бололгүй эрхэм сайдыг намынхан нь дайрч олонх авч үлдвэл “Ц.Нямдоржийг МАН дандаа хамгаалах юм” гэдэг мессеж тасрахгүй. Харин энэ бүхний эсрэгээр тэрбээр өөрөө ажлаа өгвөл “Хуулийн салбарт үнэнчээр зүтгэж, яг булхиаг нь дэлгээд ирэхээр эд нар намайг аваад хаялаа” гээд Увс нутгийнхан дээрээ очвол ирэх сонгуулиар өндөр оноо авна. Өнөөдөр монголын төрийн толгойд сууж буй лидерүүд нэг иймэрхүү тактикаар ажилласаар ирсэн. Хамгийн сонгодог жишээ л гэхэд экс Ерөнхий сайд С.Баяр энэ Засгийн газрын гол оноо авсан 1.5 сая төгрөгийг санаачлан гаргаж ирсэн ч уг асуудал бүтэлгүйтэхийг холоос харсан тул “эрүүл мэндийн шалтгаан”-аар ажлаа өгсөн. Монголын ард түмний эв нэгдлийн бэлэг тэмдэг болоод буй Ерөнхийлөгч Ц.Элбэгдорж ч мөн ийм л өдрүүдэд өөрөө албан тушаалаасаа бууж, үүнийг өөртөө ашигтайгаар эргүүлсээр ирсэн. Дээр нь Монголын түүхэнд гарч байгаагүй сонин үзэгдэл болж монголчууд тэр чигтээ унталгүй, анхаарал хандуулан талцаж, экс Ерөнхийлөгчийг АТГ-аас баривчилж байхад “Би тэр шөнө юу ч мэдээгүй унтаж байсан” гэх хошин тайлбар тавиад байгаа. Экс Ерөнхийлөгчийг баривчлах ажиллагаа нь шууд утгаараа ХЗДХ-ийн сайдад хамааралгүй ч Ц.Нямдоржийн тэргүүлж буй салбарт чухал үйл явдал тэр шөнө өнгөрсөн. Жаахан билэггүй ч гэлээ 2012 оны дөрөвдүгээр сарын 13-ны өглөө дахин буун дуу гарсан бол эрхэм сайд “Би унтаж байсан” гэх байсан уу. Гэтэл дэлхий дахинд улс төрийн соёл гээч зүйл үйлчилж, өөрөөс нь шууд хамааралгүй ч хариуцлага үүрдэг, хүлээдэг жишиг үйлчилсээр байна. Үүний сонгодог жишээ бол хоёр Солонгос буудалцахад, нөгөөх нь би эх орон руугаа бууны сум тавиуллаа. Ажлаа муу хийлээ” хэмээн ажлаа өгсөн. Японд эдийн засгийн асуудлаас үүдэн мөн л албан тушаалтнууд нь өөрийн саналаар хариуцлагаа хүлээсээр байна. Дэлхий дахины соёлыг дагаж, цаг үеэ мэдэрч ийм сонголт хийж, ирэх дөрвөн жилд сонгогчдын саналыг эргүүлэх боломж түүнд бий. С.Жигүүр