Төрийн өмчит Биокомбинат улсын үйлдвэрт үүсээд байгаа нөхцөл байдлын талаар тус компанийн ажилчидтай УИХ-ын гишүүн Ц.Сэдванчиг, Д.Кекүшюзан Батбаяр, П.Алтангэрэл нар албаны хүмүүстэй уулзаж, санал бодлыг нь сонслоо. Тус хамт олон үйлдвэрийн захирлаар томилогдоод буй “Цагаан залаа агвет” ХХК-ны захирал Б.Баттогтохын үйл ажиллагааг эсэргүүцэн хэвлэлийн бага хурал зарлаж, улс төрийн суулт хийсэн. Энэ асуудалтай холбоотойгоор ТӨХ, ХХААХҮЯ, Мэргэжлийн Хяналтын Газраас Биокомбинатын эргэн тойронд болж буй үйл явдлыг шалгах ажлын хэсгийг 11 хүний бүрэлдэхүүнтэйгээр байгуулж албан ёсны дүгнэлт гаргуулсан гэв. Төрийн өмчийн хорооны ажлын хэсгийнхэн Биокомбинатын шинэ захирал Б.Баттогтохын үйл ажиллагаатай холбогдуулж: 1. Б.Баттогтох нь мэргэжлийн болон удирдлагын чадвар, харилцааны соёл, багаар ажиллан хамт олныг манлайлах тал дээр чадваргүй 2. Боловсон хүчний томилгоо, хөдөлгөөнийг хийхдээ мэргэжлийн ур чадвар, туршлага, судалгаа дүгнэлт, хууль эрхзүйн үндэслэл муутай хандаж хамт олны дотор таагүй уур амьсгал бүрдүүлж, Хөдөлмөрийн тухай болон Төрийн албаны тухай хуулийн заалтуудыг зөрчсөн байна гэсэн албан ёсны дүгнэлтийг гаргасан хэмээн үйлдвэрийн ажилчид яриж байлаа. Үүнээс гадна Биокомбинат нь 2012 оны улсын захиалгат бүтээгдэхүүнийг үйлдвэрлэх ажлыг графикийн дагуу хийх боломжгүй болсон байна гэдгийг ажлын хэсгийнхэн дүгнэлтдээ дурьджээ. Энэ нь мөн л тус үйлдвэрийн захирлын сонгон шалгаруулалт, хууль бус үйлдлүүдтэй холбоотой гэж байлаа. Тэдний санал, дүгнэлтийг сонссон УИХ-ын гишүүд Биокомбинатын одоогийн удирдлагуудтай уулзаж, санал дүгнэлтийг нь сонсч асуудлыг шийдвэрлэх арга зам хайна гэлээ.