Говьсүмбэр аймгийн Сүмбэр сумын иргэн 58 настай, эрэгтэй П гэгч нь согтуугийн улмаас гэр бүлийнхэндээ агсам тавьсан байна. Тэрээр гэртээ долоон сартайгаас хоёр настай хоёр хүүхэд унтаж байгааг мэдсээр байж “Бүгдийг чинь ална” гэж заналхийлэн өөрийнхөө мотоциклийн банкнаас бензин авч гэр рүүгээ цацаж гал тавьжээ. Үүний улмаас нэг хашаанд байсан хоёр монгол гэр доторхи тавилга, эд зүйлийн хамтаар бүрэн шатсан байна. Долоон сартай хүүхдийн эх Б гэр шатаж байхыг хараад гал дундуур гүйн орж хоёр хүүгийн амийг аварчээ. Энэ хэрэг 2013 оны тавдугаар сарын 17-нд өдрийн цагаар гарчээ. Одоогоор уг хэрэгт Эрүүгийн хуулийн ерөнхий ангийн 32 дугаар зүйлийг журамлан, мөн хуулийн тусгай ангийн 91 дүгээр зүйлийн 91.2.2, 91.2.13, 91.2.16 дахь хэсэгт зааснаар тус тус зүйлчлэн эрүүгийн хэрэг үүсгэн шалгаж байгаа бөгөөд энэ этгээд урьд нь хоёр ч удаа өөрийн гэрээ шатаахыг завдсан байна. Хэрэгт Говьсүмбэр аймгийн прокурорын газраас хяналт тавьж ажиллаж байна гэж Улсын Ерөнхий прокурорын газрын хэвлэл мэдээллийн албанаас мэдээллээ. Б.Одон