Монголбанкны ханшаар 20-ны өдөр төгрөгийн ам.доллартай харьцах ханш 1,373.80 төгрөг байна. Энэ нь өмнөх сарын эцсийн ханштай харьцуулахад суларсан үзүүлэлт юм. Төгрөгийн ам. доллартай харьцах ханш арваннэгдүгээр сарын эцэст 1340.9 төгрөг болж, өмнөх сараас 43 төгрөг, өмнөх оны мөн үеэс 94 төгрөгөөр суларсан байгаа. Тус сард төгрөгийн ам. доллартай харьцах дундаж ханш 1323.42 төгрөг байсан юм. Тэгэхээр өнгөрөгч 2010 оны хамгийн их чангарсан валют Монгол төгрөг эрчээ алдсан дүр зураг харагдаж байна. Bloomberg-ийн бизнес долоо хоног сэтгүүл 2010 онд ам.долларын эсрэг хамгийн их чангарсан валютаар Монгол төгрөгийг нэрлэж байсан билээ. Сануулахад, 2010 оны 1 дүгээр сард 1 ам.доллар 1455.7 төгрөгтэй тэнцэж байсан бол гадаад валютын урсгал нэмэгдсэнээр төгрөгийн ханш чангаран мөн оны 12 дугаар сарын 31-ний байдлаар 1 ам.доллар 1258.17 төгрөгтэй тэнцэж 200 орчим төгрөгөөр ханш чангарч байсан. Улмаар эдийн засагчид 2011 онд манай улсын экспортын гол нэрийн бүтээгдэхүүний орлого 40 гаруй хувиар өсөх, гадаад валютын цэвэр албан нөөц 72 хувиар өсч 3.6 тэрбум ам.долларт хүрнэ гэсэн прогнозыг хийсэн бөгөөд , төгрөгийн ханш үргэлжилж, 2011 онд төгрөгийн ам.доллартай харьцах ханш 3 хувиар чангарч, 1222 төгрөгт хүрнэ гэсэн тооцоог хийгээд байсан. Харин 2011 он төгсөх гэж буй энэ үед харахад эдийн засагчдын прогноз биеллээ олсонгүй.