ОХУ-ын эх газрыг Крымын хойгтой холбосон гүүр албан ёсоор нээлтээ хийсэн талаар “TASS” агентлаг мэдээллээ.

19 км урт гүүрийг нээх ёслолын ажиллагаанд ОХУ-ын Ерөнхийлөгч В.Путин болон хойгийн оршин суугчид, энэхүү түүхэн бүтээн байгуулалтыг хийсэн ажилчид оролцсон байна.

Ерөнхийлөгч Путин өөрөө ачааны машин жолоодож, Крымын хойгт иржээ. “Энэхүү гүүрийг барих ажилд 10 мянган хүн, 220 орчим компани оролцсон” хэмээн Путин мэдэгдлээ.

Төлөвлөгөөний дагуу энэхүү гүүр ирэх 2019 оны нэгдүгээр сард нээлтээ хийх ёстой байсан ч ажилчид хугацаанаасаа өмнө буюу 1.5 жилийн өмнө ажлаа дуусгаж, Москвад хүлээлгэн өгчээ.

Гүүр хоёр хэсэгтэй бөгөөд өчигдөр нээлтээ хийсэн нь автомашинд зориулсан бол тун удахгүй нээлтээ хийхээр хүлээлгэдэж буй хоёрдахь гүүрээр ачааны галт тэрэг, зорчигч тээврийн галт тэрэг зорчих гэнэ.

Крымын хойгийн оршин суугчид өнгөрсөн 2014 онд ОХУ-ын эх газартай нэгдэх бүх нийтийн санал асуулга явуулсан бөгөөд санал асуулгад оролцсон нийт иргэдийг 98 хувь нь Оростой нэгдэхийг зөвшөөрсөн юм. Өнөөг хүртэл Украины эрх баригчид “Крымын хойгийг ОХУ хүчээр булаан эзэлсэн” хэмээн үзэж, дайсагнасаар байна.

Б.Дэлгэрцэцэг