Саудын Арабын иргэн, сэтгүүлч Жамал Хашоггийн учир битүүлэг хэрэг олны анхаарлыг татсаар байна. Сэтгүүлч эр энэ сарын 2-нд Истанбул дахь Саудын Арабын Консулын газарт очсон цагаасаа сураггүй алга болсон юм.
Тус улсын эрх баригчид өнгөрөгч долоо хоногт сэтгүүлчийг золгүй байдлаар амиа алдсан хэмээгээд эмгэнэл илэрхийлсэн билээ.
Дэлхий нийтээрээ уг хэргийн ард Саудын Арабыг бий хэмээн хардаж, хариуцлага нэхэж байна.
Саудын Араб уг хэрэгтэй ямар ч холбоогүй гэдгээ мэдэгдсэн ба буруугүй гэдгээ батлахаа амлаад буй юм. Туркийн тал Саудын Арабаас ирсэн тусгай баг сэтгүүлчийг хөнөөсөн хэмээж, цогцсыг нь хайсаар байгаа.
Туркийн тал хэдэн өдрийн өмнө хэрэг гарах өдөр сэтгүүлчийг Консулын байр руу орсон бичлэгийг цацсан юм. Тэгвэл өчигдөр сэтгүүлчийн хувцсыг өмссөн хүн Консулын байраас гарч яваа бичлэгийг Туркийн тал орон нутгийн хэвлэлээр цацжээ.
"Хяналтын камерт бичигдсэн уг эр сэтгүүлчийн хувцсыг өмссөн ч өөр хүн гэдэг нь андашгүй байна" гэж "CNN" агентлаг мэдээлжээ.
Сэтгүүлчтэй ижилхэн хувцасласан 50 орчим насны эрэгтэй санаатайгаар олон нийтийн газраар явж, хяналтын камеруудад өртөж байгаа нь илт байсан аж.
Б.Дэлгэрцэцэг
Уншиж байна |