ОХУ-ыг чиглэсэн тагнуулын үйл ажиллагаа эрчимжиж буйг Ерөнхийлөгч В.Путин онцолжээ. Энэ талаар Британийн “ВВС” агентлаг мэдээллээ.
ОХУ-ын Ерөнхийлөгч В.Путин Холбооны Аюулаас хамгаалах байгууллагын /ХАХБ/ удирдлагуудтай жил бүрийн гуравдугаар сард уулздаг уламжлалтай. Тэрбээр энэ удаагийн уулзалтынхаа эхэнд нэгэн ноцтой мэдэгдэл хийсэн нь олныг цочирдууллаа.
2018 онд /ХАХБ/-ын тусгайгийнхан ОХУ-д тагнуул хийхээр ирсэн 600 гаруй тагнуулчийг амжилттай баривчилсан талаар Ерөнхийлөгч мэдэгдлийнхээ үеэр онцолжээ. Тусгайгийнхан нийт 129 тагнуулч, 465 мэдээлэл дамжуулагчийг баривчилж, хууль бус үйл ажиллагааг нь таслан зогсоосон гэнэ.
Гэхдээ тагнуулчид ОХУ-ын газар нутагт ямар хууль бус үйл ажиллагаа явуулсан, ямар материалыг гартаа оруулсан гэх мэдээллийг “нууцын зэрэглэл”-д хамааралтай хэмээгээд Путин нийтэд задруулахаас татгалзсан байна.
Энэ талаар Ерөнхийлөгч “Тагнуулчдын үйл ажиллагаа өмнөхөөсөө хэд дахин эрчимжиж байна. Тэд зөвхөн Кремлийг онилох бус бүх салбарт эрхээ тогтоохыг санаархах боллоо. /ХАХБ/-ын удирдлагууд тагнуулчтай хатуухан тэмцэж, тэдэнд улсынхаа нууцыг алдахаас бүрэн хамгаалах учиртай” гэж сануулав.
Тагнуулчдын гол бай ОХУ-ын Батлан хамгаалах салбар гэдгийг албаныхан үгүйсгээгүй аж. Тус салбарын серверт халдах гэсэн олон удаагийн кибер халдлагаас урьдчилан сэргийлж чаджээ.
Ерөнхийлөгч үргэлжлүүлэн “Тагнуулчид ОХУ-ын улс төр, эдийн засаг, шинжлэх ухаан болон технологийн салбарын гол мэдээллийг гартаа оруулахыг санаархдаг. /ХАХБ/-ын удирдлагууд хатуухан тэмцэхээс гадна Оросын шинэ зэвсгийн үйлдвэрлэлийн талаарх мэдээллийг чандлан нууцлах ажилд гол анхаарлаа хандуулах учиртай” гэж хэллээ.
Путины мэдэгдлийн дараахан /ХАХБ/-д баригдаад буй тагнуулчдын дийлэнх нь АНУ, Британийн иргэд гэх мэдээлэл нийгмийн сүлжээгээр тархах болжээ. Гэхдээ уг мэдээллийг Кремлийн хэвлэлийн алба эрс үгүйсгэж “Тусгайгийнхан тагнуулын хэрэгт холбогдсон этгээдүүдийг нэг бүрчлэн шалгаж байгаа. Энэ талаар дэлгэрэнгүй мэдээлэл өгөх боломжгүй. Хэвлэлээр цацагдаж буй мэдээлэл худал, ташаа” гэж мэдэгджээ.
ОХУ-ын газар нутагт тагнуул хийхийг завдсан этгээдүүдийн тоо сүүлийн жилүүдэд өсөн нэмэгдэж, 2017 онтой харьцуулахад 40-50 хувиар нэмэгдсэн гэнэ.
ОХУ тагнуулчаас ихээхэн болгоомжилж, хамгаалалтаа нэмэгдүүлж буй бол олон улс Оросын тагнуулч, хакеруудаас сэрэмжилж байна. АНУ тэргүүтэй барууны орнууд ОХУ-ын Засгийн газарт ажилладаг хакерууд олон улсад заналхийлдэг хэмээн буруутгасаар ирсэн.
2016 оны АНУ-ын Ерөнхийлөгчийн сонгуулийн дүнд Орос хакерууд нөлөөлсөн, 2018 онд ОХУ-ын экс тагнуулч Сергей Скрипаль охиных нь хамтаар Британид хордуулсан гэх хэрэгтэй холбогдуулан цагдаагийнхан Оросын хоёр тагнуулчийг баривчлаад буй.
Экс тагнуулчийн хэрэгтэй холбогдуулан Их Британийн болон холбоотон 24 улс ОХУ-ын 100 гаруй дипломатчдыг нутгаасаа албадан гаргажээ. Уг асуудлаас болж ОХУ, Британи муудалцаж, зөрчилдөхөд хүрчээ.
АНУ-ын тусгай прокуророор удирдуулсан багийнхан Оросын хакерууд АНУ-ын Ерөнхийлөгчийн сонгуульд нөлөөлсөн гэх баримт нотолгоог гартаа оруулсан гэдгээ мэдэгдэж, 2020 оны Ерөнхийлөгчийн сонгуулийн үеэр анхаарал сэрэмжтэй ажиллахыг Холбооны мөрдөх товчоонд илэрхийлжээ.
Гэхдээ дээрх хоёр хэрэгтэй ОХУ ямар ч холбоогүй гэдгээ Ерөнхийлөгч В.Путин олонтоо илэрхийлсэн ч тэдний байр суурийг өөрчилж чадаагүй юм.
Саяхан АНУ-ын Засгийн газар ирэх сард болох Европын холбооны сонгуулийн дүнд Оросын хакерууд нөлөөлж болзошгүй гэх сэрэмжлүүлэг гаргажээ.
Хүйтэн дайнаас хойш ОХУ, АНУ-ын харилцаа ингэж муудаагүй бөгөөд тагнуулч, кибер халдлагаас болж, дэлхийн хүчирхэг гүрнүүд дайсагнахад хүрээд байна. Хэдий хоёр улс дайсагнасан харилцаагаа эв зүйгээр шийдвэрлэхээр ПУТИН-ТРАМП нарын дээд хэмжээний уулзалт зохион байгуулсан ч үр дүнгээ өгөөгүй.
Б.Дэлгэрцэцэг
Уншиж байна |