МАН-ын Хяналтын хороо хуралдаж, УИХ-ын гишүүн Ш.Раднаасэд, Д.Дамба-Очир нарт таван жилийн хугацаанд улс төрийн дэмжлэг үзүүлэхгүй гэсэн шийдвэр гаргалаа. Энэ шийдвэрийн талаар УИХ дахь МАН-ын бүлгийн дарга Д.Тогтохсүрэнгийн байр суурийг хүргэж байна.
-Намын Хяналтын хорооны шийдвэрийг хэрхэн харж байна вэ?
-УИХ дахь намын бүлэг үүнийг буруу шийдвэр гэж үзэж байна. Би Батбаатар даргатай хоёр удаа ярьсан. Раднаасэдийн хувьд хөөн хэлэлцэх хугацаатай холбоотой юм байна. Харин Дамба-Очир гишүүний тухайд Оюутолгой компанид шалгалтын материал гаргаж өгсөн гэдгээр нь юм байна. УИХ-ын гишүүн чуулган болон байнгын хорооны хуралдаанд үг хэлснийхээ төлөө хариуцлага хүлээж болохгүй.
-Бүлэг гишүүдээ яаж хамгаалах вэ?
-Намын хяналтын байгууллагыг дахиж хуралдаач гэсэн хүсэлт тавьж байгаа. Хурдан түргэн шийдсэн энэ асуудлаа эргэж авч үзээч гэсэн хүсэлт тавьж байна. Хууль хяналтын байгууллагаар тогтоогдоогүй асуудлаар ийм хурдан шийдвэр гаргаж, гишүүдийн эрх ашгийг ингэж хөндөж болохгүй. УИХ-ын гишүүнийг үг хэлснийх нь төлөө, байнгын хорооны даргыг албан бичиг явуулсны төлөө ийм шийдвэр гаргавал цаашид УИХ-ын гишүүд бүрэн эрхээ хэрэгжүүлж чадах уу.
-Энэ асуудлыг намын дүрмээр шийдэх нь зөв үү?
-Намын эв нэгдэлд харш, намын бодлого шийдвэрийг эрс зөрчсөн, хяналтын байгууллагаар хууль зөрчсөн нь тогтоогдсон үед арга хэмжээ авна. Харин хэвлэлээр мэдээлэл гарсны төлөө арга хэмжээ аваад байвал энэ 64 хүн бүгдээрээ хариуцлага хүлээж магадгүй.
Б.Болд
Уншиж байна |