Афганистаны эрх мэдлийг гартаа авсан "Талибан" хөдөлгөөн иргэдээ гүйлгээнд гагцхүү үндэсний валют афганиг ашиглахыг уриалжээ. Энэ талаар түр засгийн газрын Мэдээлэл, соёлын дэд сайд Забихулла Мужахид Твиттер хуудсаараа дамжуулан мэдэгдсэн байна. 

Түүний өгүүлснээр, зөвхөн үндэсний валют ашиглах журмыг зөрчсөн этгээдүүдийг шүүхээр шийтгэх гэнэ. "Гадаадын валют ашиглах нь эдийн засагт сөргөөр нөлөөлж, эндээс үүдсэн алдагдал иргэн бүрт тусна" хэмээн Мужахид мэдэгджээ.

Өмнө нь тэрбээр Афганистаны шинэ засгийн орлогын гол эх үүсвэрүүдийн талаар мэдэгдэж байв. Түүний өгүүлснээр, татвар, гаалийн татвараас орлого олох бөгөөд цаашлаад ашигт малтмалын олборлолтоос орлого олохоор төлөвлөж байгаа гэнэ.

Г.Бямбасүрэн