УОК-оос цас, зудын нөхцөл байдал болон Дүнжингаравын уулзварт болсон дэлбэрэлтийн дүгнэлтийн явц болон шатахуун  түгээх станцуудад хийсэн хяналт шалгалтын талаар мэдээлэл хийлээ.

Тодруулбал, Дүнжингаравын уулзварт нэгдүгээр сарын 23-24-нд шилжих шөнө газ тээвэрлэж явсан машин суудлын тэрэгтэй мөргөлдөж, ослын улмаас их хэмжээг хамарсан дэлбэрэлт үүссэн. Улмаар ойролцоох 60 айлын орон сууц галд өртөж, онцгой байдлын гурван хаагч амиа алдсан. Мөн галын улмаас эмнэлэгт хүргэгдсэн хүмүүсээс хоёр нь түлэнхийн шархаа даалгүй нас барсан харамсалтай осол гарсан юм. Энэ талаар ХНХЯ-ны дарга Б.Нарангарав мэдээлэл өглөө.

 Тэрбээр “Дашваанжил” компанийн үйл ажиллагаанд хамтарсан баг хяналт шалгалт хийлээ. Сүүлийн таван жил уг компанид хяналт шалгалт хийгдээгүй байна.  Хяналтын үед дараах зөрчил илэрсэн. Тухайлбал, Хууль тогтоомжийн дагуу хөдөлмөрийн дотоод журмаа батлаагүй. Цалин хөлсний журам баталж, мөрдүүлээгүй. Хөдөлмөр норм батлаагүй зэрэг зөрчлүүд илэрсэн. 518 ажилтантай энэ томоохон компани нь хөдөлмөрийн аюулгүй байдал, эрүүл ахуйн байдал хариуцсан ажилтан байхгүй. Эрсдэл өндөртэй салбарт ажилчдын тооноос хамаарахгүй хариуцсан ажилтан байх ёстой гэсэн заалт байдаг.

Тухайн жолоочийг ажилд явуулахад ямар эрсдэл тулгарч болохыг урьдчилан тогтоож, эрсдэл гарсан тохиолдолд ямар арга хэмжээ авах талаар эрсдлийн үнэлгээ хийх шаардлагатай байсан. Энэ ажил олгогчийн үүргээ биелүүлээгүй зөрчил байна. 

Хуульд заасны дагуу эрсдэлтэй ажлын байранд ажилладаг ажилтны амь нас, эрүүл мэндийг 36 сар ба түүнээс дээш сарын дундаж цалинтай тэнцэх хэмжээний төгрөгөөр даатгуулах ёстой. Энэхүү даатгалыг хийлгээгүй байна. Иймд шалгалт хийсэн улсын байцаагч нар тус компанид торгууль, нөхөн төлбөр тавьж, хяналт тавьж ажиллаж байна" гэлээ.