Монгол Улсын Соёлын гавьяат зүтгэлтэн, бурханч лам Г.Пүрэвбат нас барсан харамсалтай мэдээлэл гарсан билээ. Тэгвэл талийгаачийг хаднаас унаж биедээ хүнд бэртэл авч энэ сарын 4-ны өдөр ГССҮТ-д хүргэгдэн ирээд эмчилгээ хийлгэж байгаад нас барсан гэдгийг эх сурвалж хэлж байна. Чухам яагаад хаднаас унасныг хууль хяналтын байгууллагаас шалгаж байгаа юм байна. 

Талийгаач 1990 онд Энэтхэгийн Дарамсалад очиж 3 жил Төвөдийн Бурхан урлалын сургуулийн урлахуйн ангийг төгссөн.  Мэгжид Жанрайсаг бурхныг шүншиглэх, IX Богдыг занданшуулах, Д.Сүхбаатар, Х.Чойбалсан нарын шарилыг Төрийн ордны Бунханаас зөөж оршуулах, Монгол Төрийн шүтээн Есөн хөлт цагаан тугийг амилуулах зэрэг ажилд гар бие оролцсон. 2010 оноос төрсөн нутагтаа Аглаг бүтээлийн хийдийг үүсгэн байгуулж “Өлзийг бадруулагч хийд орон” болно хэмээн айлдсан байдаг. Өдгөө энэ хийд нь сүсэгтэн олон гадаад дотоодын жуулчдын очих дуртай газар болжээ.

2017 оны хоёрдугаар сард Улаанбаатар эрдэм их сургуульд “Монголын бурхны шашны урлахуйн ухааны тогтолцоо болон хөгжлийн хэтийн төлөв, үнэлэмжийн асуудал” сэдэвт ажлаар докторын зэрэг хамгаалсан. Түүний Монголын бурханы шашин ялангуяа бурхан урлалын салбарт оруулсан хувь нэмэр хэмжээлэшгүй их билээ.