Өчигдөр /2024.04.17/ 19.00 цагийн үед Чингэлтэй дүүргийн 15 дугаар хорооны нутаг дэвсгэрт Toyota Prius маркийн автомашин Hyundai Verna маркийн автомашинтай мөргөлдсөний улмаас явганаар зорчиж байсан 9-14 насны 6 хүүхэд, насанд хүрсэн 1 хүнийг мөргөсөн харамсалтай осол бүртгэгдсэн билээ. 

Дуудлага, мэдээллийн дагуу цагдаагийн байгууллагаас шалгалтын ажиллагаа явуулж байгаа бөгөөд урьдчилсан байдлаар ослын улмаас нэг хүүхэд нас барсан байна. Энэхүү ноцтой ослын улмаас зургаан хүүхэд, нэг том хүн ГССҮТ-д хүргэгдсэн. Хүлээж авсан эмчлэгч эмчийн хэлж буйгаар "Нэг том, хоёр хүүхдийн биеийн байдал маш хүнд Эрчимт эмчилгээний тасагт яаралтайгаар хагалгаанд орсон. Бусад хүүхдүүд нь хөл гарын хугаралтай, хавсарсан гэмтэлтэй энгийн тасаг руу шилжүүлсэн байна" гэсэн мэдээллийг өгсөн юм. 

Гэрчүүдийн ярьж буйгаар жолооч туслах замаас хурдтай гарч ирээд төв зам дээр Верна маркийн машинтай хүчтэй мөргөлдсөн. Мөргөлдөхдөө эсрэг урсгал руу гарч явган хүний зам дээр явж байсан 6 хүүхэд, нэг том хүнийг бүгдийг нь хамж дайраад цаашаа айлын хашаа дайраад зогссон гэх мэдээллийг өгсөн юм. 

Хохирогч хүүхдүүд хичээлээ тараад асран хамгаалагчийнхаа хамт явган хүний замаар явж байтал ийнхүү хурдаа хэтрүүлсэн жолооч зам дээр гарч ирж, бүгдийг нь дайрч, амь нас эрүүл мэндэд нь эрсдэл учруулсанд ар гэрийнхэн нь төдийгүй ард иргэд гомдолтой байна. Зүгээр мөрөөрөө хичээлээ тараад гэртээ харих зам хүртэл аюултай болсны тод жишээг энэхүү аймшигт осол харууллаа. 

Осол гаргасан машины жолооч нь эмэгтэй хүн байсан бөгөөд жолоочийн талаарх мэдээллийг цагдаагийн байгууллагаас мэдээллэх боломжгүй, прокурорын зөвшөөрөлтэй мэдээлнэ гэсэн юм. 

Тухайн жолооч согтуу байсан уу, эрүүл байсан уу гэдэг нь мэдэгдээгүй. Цагдаагийн байгууллагаас өнөөдөр тодорхой мэдээлэл өгнө гэсэн. Тухайн байгууллагаас шалгаж байгаа юм байна.  Мөн сэрэмжлүүлэг хүргэхэд, сургууль цэцэрлэгийн орчинд жолооч нар хурд хэтрүүлэхгүй байх, замын хөдөлгөөнд оролцохдоо гар утсаа оролдож үзэхгүй байхыг, мөн замын хөдөлгөөнд дүрмээрээ соёлтой оролцохыг ТЦА-наас анхааруулж сэрэмжлүүлж байна.