Өнгөрсөн ням гаригт Монгол туургатны үндэсний бөхийн тавдугаар наадам АСА циркэд болж өнгөрсөн билээ. Энэ үеэр буриад, халимаг, тува, өвөрмонголоос бөхчүүд ирж барилдсан. Бөхийн барилдааны дундуур өвөрмонголын бөхчүүд өөрийн өмсгөлтэйгөө гарч дүрмийнхээ дагуу үзүүлэх барилдаан хийж сонирхуулсан нь бөх сонирхогч, үзэгчдийн анхаарлыг татаж байлаа.  Ингээд өвөрмонгол бөх болон манай үндэсний бөхийн ялгаатай талуудыг сонирхуулая. -Өвөрмонгол бөхийн барилдаанд малгай өмсөхгүй, шуудаг өмсөхгүй зөвхөн Банзал хэмээх өмд. Туушуу хэмээх өвдгөвч, Лавир хэмээх хормойвч (улаан ногоон хөх лавиртай) өмсдөг. -Зангиа олгодог, цол олгодоггүй -Засуулгүй барилдана, зөвхөн шүүгч даамал шүүнэ. Хөлийн цэц байдаггүй. -Ам угтуул авах, гоц мөргөх ёс байхгүй. Зарчмын чанартай буюу үндсэн ялгаатай зүйл: - Өвөрмонгол бөх гараар, хөл хонгонд хүрдэггүй. Гараар газар тулбал ойчсонд тооцно. -Гараар хөлд хийдэг мэх байдаггүй. -Туг тойрч дэвэхгүй зөвхөн байршил руугаа дэвэн буцна. -Бай шагналыг нэгийн даваанаас барилдсан бүх бөхчүүдэд олгоно. Хамгийн хүндтэй шагнал мөнгөн буйлтай цагаан тэмээ тэргүүтэй өсөн ес 81-ийн эртний монгол бэлгийн заншил Өвөрмонголд уламжлагдан иржээ.