БНСУ-ын хөрөнгө оруулалттай, ашгийн бус гэх нэгэн төрийн бус байгууллага хууль бус үйл ажиллагаа явуулж байгаа талаар иргэн О.Оюунжаргал өнөөдөр сэтгүүлчдэд мэдээлэл хийлээ. Тодруулбал, "Комекс" Солонгос Монголын харилцааг дэмжих нийгэмлэгийн Монголд дахь төлөөлөгчийн газрын захирал Им Хан Гюу орчуулагч О.Оюунжаргалыг  удаа дараа утсаар заналхийлжээ. Тэрээр "Би "Комекс" Солонгос Монголын харилцааг дэмжих нийгэмлэгийн Монголд дахь төлөөлөгчийн газарт орчуулагч хийдэг юм. Тэгтэл саяхан тус нийгэмлэгийн захирал Им Хан Гюу "Солонгосоос үнэ хямдарсан бараа авчиртал татвар ноогдуулах гээд байна. Яах вэ?" гэсэн. Хариуд нь би "Нийгэмлэгийн нэрийг барьж ашиг олох зорилгоор бизнесийн үйл ажиллагаа явуулж болохгүй. Энэ нь хууль зөрчсөн үйлдэл" гэж зөвлөсөн. Гэтэл намайг түүний хуулийн зөвлөх бас өөр нэг эмэгтэй утсаар дарамталж, хэл амаар доромжилсон. Миний бодлоор тус нийгэмлэг нь Сонгонохайрхан дүүргийн Тахилтын аманд мод тарих нэрийдлээр энэ мэтчилэн ашиг олох зорилгоор бизнесийн үйл ажиллагаа явуулж байхыг үгүйсгэхгүй. Уг нь нийгэмлэг гэдэг чинь ашгийн төлөө бус байгууллага байхгүй юу. Намайг утсаар удаа дараа дарамталсан энэ асуудлыг хуулийн байгууллагад хандан, шалгуулна” хэмээн мэдэгдэв.

Б.Одон