Архангай аймгийн Засаг дарга асан Ё.Баатарбилэгийг Сэлэнгэ аймаг дахь Цагдан хорих төвд хориод хэд хонож байна. Улсын мөрдөн байцаах газрын Байгаль орчны хэв журмын хэлтсээс баривчилсан гэх мэдээлэл гарсан бол энэ мэдээлэл худлаа гэдгийг эх сурвалж “Манайд холбогдолтой хэрэгт Ё.Баатарбилэгт холбогдох хэрэг байхгүй ээ. Хэвлэл мэдээллийн хэрэгслээр худлаа мэдээлэл цацаад байх юм. Түүнийг авлигын хэргээр АТГ-аас баривчилсан байх” гэлээ. Харин түүнийг АТГ-аас албан тушаалын байдлаа ашиглан авлига авсан, өгсөн, тараасан гэх үндэслэлээр хорьсон юм байна. Цагдан хорих 461 дүгээр ангид гурав хоног буюу 72 цаг хорьчихоод шүүхийн захирамж гарч Сэлэнгэ аймгийн Зүүнхараа дахь Цагдан хорих төвд үргэлжлүүлэн хорих шийдвэрийг гаргажээ. Цагдан хорих төвд баривчлах байрнаас гурван хоногийн хугацаа дууссан учир өөр газар цагдан хорих шүүхийн захирамж гарсан юм байна. Ё.Баатарбилэг өмнө нь мөн байгаль орчны асуудал болон банкинд хадгалуулсан мөнгө болон бусад орлогын эх үүсвэрээ шалгуулж байсан ч хариуцлага тооцогдож байгаагүй юм. Тэгвэл одоо түүнийг авлигын хэргээр саатуулсан юм байна.