Тодруулбал, тээвэр зуучлалын чиглэлээр үйл ажиллагаа явуулдаг “Цээмаа” компанийн хариуцлаггүй үйлдлийн улмаас каргогоор ирсэн ачаа нь улсын өмч болоход хүрчээ. Энэ хэргийг улсын мөрдөн байцаах газар шалгаж байгаа бөгөөд ачаагаа авахыг хүссэн иргэд тус газрын үүдийг сахих болжээ. Өнөөдөр Улсын мөрдөн байцаах газраас ачааг тээвэрлэж ирсэн “Ланд Бирж” гэх компанийн удирдлагыг дуудуулсан байна. Мөн тус компанийн удирдлагуудыг ирэхээр иргэдийн ачааг өгөх шаардлагыг тавина гэж байсан боловч 10 цагт ирэх ёстой байсан дээрх компанийн удирдлагууд 13 цаг гэхэд ирээгүй байсан юм.

Хохирсон иргэдийн хэлж байгаагаар Швед дэхь тээвэр зуучлалын компанийн н.Ариунаа гэгч эмэгтэй тээврийнхээ зардлыг төлөөгүйгээс 160 гаруй хүн ачаагаа авч чадахгүй олон сарыг ардаа аваад байгаа аж. Харин тээвэрлэж ирсэн “Ланд Бирж” гэх компани нь тээврийнхээ зардлыг төлүүлж байж, иргэдийн ачааг тараахаа хэлсэн байна. Үүнээс гадна иргэд ачааныхаа тээврийн үнийг Шведээс явуулахад нь төлсөн боловч Монголд ирэхэд нь дахин төлөх шаардлага гарсан хэмээж байлаа.

Б.Одон