Энэ жил Үндэсний их баяр наадамд зарцуулах төсвийг мөнгийг 50 тэрбум төгрөг байхаар тооцжээ. Гэхдээ энэхүү төсвийг Засгийн газар хараахан батлаагүй байгаа. Харин баяр наадмыг зохион байгуулах комиссийнхон энэ жил зориуд их мөнгө гаргаж байгаа нь зуны олимпийн наадмыг 2040 онд Улаанбаатарт зохион байгуулна гэсэн зорилгыг хэрэгжүүлэхтэй холбоотой хэмээн талбарлаж байгаа. Харин уг асуудлаар “Онлайн парламент”-чид өнөөдөр сэтгүүлчдэд мэдээлэл хийсэн юм. Хэдийгээр бүтээн байгуулалтын шинжтэй олон ажил хийгдэхээр төлөвлөсөн ч найр цэнгээн, урлаг соёлын арга хэмжээ, урсгал зардалд л гэхэлд 3.8 тэрбум төгрөг зарцуулж байгаа нь хэтэрхий их зардал урсаж байна гэдгийг тэд хэлж байлаа. Тодруулбал наадмыг зохион байгуулахад оролцох соёл урлагийн салбар хороо энэ жил 969.9 сая төгрөг буюу бараг тэрбум төгрөг зарцуулахаар болжээ. Гэтэл өнгөрсөн оны наадмаар тус салбар хороо 82.2 сая төгрөгт багтааж урлаг соёлын арга хэмжээг зохион байгуулж байсан бол жилийн дараа 10 дахин нэмэгдсэн байгааг хэлсэн. Мөн Төв цэнгэлдэх хүрээлэн, сур, шагайн асар, цэнгэлдэх орчимд байгуулах автозогсоолын  урсгал засварт өнгөрсөн жил 100 гаруй сая төгрөг зарцуулж байсан бол энэ жил 300 гаруй сая төгрөгийн засвар, тохижилтийн ажил хийж байгаа нь төсвийн мөнгийг үрэн таран хийж байна.   Тиймээс  “Онлайн парламент”-ийн гишүүдийн зүгээс Засгийн газарт хандаж  50 тэрбум төгрөгийн задаргааг шаардсан санал зөвлөмж хүргүүлж байгаа юм байна. Д.Цэцэг