Сурталчилгааны 33 хоног бараг талдаа хүрч ирлээ.

Н.Удвал нэр дэвшигч /МАХН/ жинхэнэ ард олныхоо аминчхан үг яриаг сонсож яваа юм байна.  Баянхонгор аймагт  өрх толгойлсон эмэгтэйчүүд  430 гаруй, хөгжлийн бэрхшээлтэй иргэд 370 бий гэнэ. Мөн арван эмэгтэй тутмын тав нь нөхрөөсөө салсан, архидалт, хардалт гээд олон янзын шалтгаанаар гэр бүл салалт өндөр хувьтай байгааг хүүхнүүдэд эмэгтэй нэр дэвшигчид аминчлан ярьж, арга хэмжээ авч өгөөч, энэ чиглэлд хамтарч ажиллая гэхчлэн хандаж байна гэнэ.

Ингээд зогсохгүй цаашид нам харгалзахгүй Н.Удвалыг дэмжихээ илэрхийлсэн иргэд нэгдэж холбоо байгуулж байгааг хэллээ. Мөн иргэдийн дунд мөнгөн усгүй амьдаръя хөдөлгөөн өрнүүлж байгаа юм байна.

.

Нэр дэвшигч Б.Батэрдэнэ /МАН/ Гадаадад суугаа нутаг нэгт монголчууддаа хандан уриалга гаргасан байна. “... Та бүхэн хүний газар хөлөө олж, ажиллаж амьдраад зогсохгүй голомтоо сахиж үлдсэн мянга мянган өрх бүлийг тэжээн тэтгэж, олон хүүхдийг сайхан ирээдүйтэй нь золгуулж байгаа нь үнэн юм. Харь газар ном үзэж буй сэргэлэн цовоо охид хөвгүүдээ харахад өөрийн эрхгүй бахархах сэтгэл төрдөг. Та бүхний эрч хүч, эрмэлзэл, тэмүүлэл эзэн Чингисийн үр хойчийг дэлхийд таниулж байгаа гэдэгт би итгэдэг...” гээд “...Гадаад орнуудад сурч, ажиллаж, амьдарч яваа Монголчуудынхаа эрх ашгийг хамгаалах, нарийн мэргэжил, өндөр чадвар эзэмшсэн иргэдээ эх орондоо ирж ажиллах таатай нөхцөлийг бүрдүүлсэн хууль санаачлан батлуулахын төлөө ажиллана. Мөн дотооддоо оюутан залуус үндэсний тэтгэлэгт хамрагддагийн адил гадаадад сурч байгаа оюутнууд маань ч гэсэн тэтгэлэгтэй байх ёстой гэж би боддог” гэжээ.

 .

Ц.Элбэгдорж нэр дэвшигчийн /АН/ хувьд их сонирхолтой болж ирж байна.

УИХ-ын гишүүн, БСШУ-ны сайд асан Ё.Отгонбаярын эхнэр О.Эрдэнэсолонгын нэрийн дансаар их хэмжээний буюу 323 сая ам. доллар, 13.9 тэрбум төгрөг байршсан болохыг цагдаагийнхан илрүүллээ гэсэн мэдээний үзүүр Авилгатай тэмцлийг эхлүүлсэн  имиджээ түлхүү товойлгохыг эрмэлзэж байгаа нэр дэвшигч Ц.Элбэгдорж руу эргэлээ.

Өдөр ирэх бүр дуулиан нэмж байгаа хуучин сайд дарга нарын мөнгө эргүүлсэн, завшсан гэх хэргийн мэдээ нь энэ сонгуулийг дуустал улам өндөр авна гэсэн таамаг сонгогчдод байна.

.

“Тэр хэлснээ хийдэг”  гэдгийн баталгаа бол эдгээр нийгэмд ил болж байгаа дуулиант хэргүүд юм байна гэж ойлгож болохоор байна. Нэр дэвшигч Ц.Элбэгдорж хөдөө орон нутгийн иргэдтэй уулзахдаа энэ талаараа ярьж өөрийн оноог нэмсээр байна. “...Авлигачид 40 цэцэрлэг, 12 сургууль, найман эмнэлэг барих хэмжээний мөнгийг шамшигдуулсан, сейфтэй мөнгөө хог дээр хаяхдаа тулсныг жишээлэхэд иргэд уулга алдаж, шогширч хүлээж авч байна гэсэн нь энэхүү албан тушаалтны эргэн тойрондох авилгын хэргийн мэдээ сонгогчидод яаж нөлөөлж байгааг мэдэрч болохоор байна. Үүн дээр хуучин нэг сайдын эхнэрийн дансаар 452 тэрбум 200 сая төгрөг  буюу хөдөөд хамгийн ойрхон жишээлэхэд 100 сумын жилийн төсөвтэй тэнцэх мөнгийг дансаараа угаасан байсан нь илэрч байна гэж нэмэхэд жирийн иргэд авилгатай тэмцэх амлалтаа биелүүлж байгааг нь  дуу алдан хүлээж авах нь ойлгомжтой. Ирэх долоо хоногт нэр дэвшигч хөдөө орон нутгийн аяллаа бараг дуусгах биз ээ.

.

П.Баярхүү / тоймч /